Ил Түмэҥҥэ "Олохтоох бэйэни салайыныы" сокуонун тула парламентскай истии буолла

Өрөспүүбүлүкэбитигэр олохтоох бэйэни салайыныы туһунан саҥа сокуон олоххо киирээри турар. Бу сокуон барыла киэҥ дьүллэһиини, мөккүһүүнү, ырытыыны ыла турар диэн этиэххэ наада. Ол иннинэ Ил Түмэн дьокутааттара, улуус баһылыктара, дьокутааттара көрсөн элбэх дьүүллэһиини, ырыытыны, нэһилиэнньэҕэ өйдөтүү үлэтин ыытан тураллар. Бу сырыыга парламент истиитигэр өрөспүүбүлүкэ үрдүнэн баар 445 олохтоох бэйэни салайыныы уоргана бүттүүнэ кытынна.

Екатерина Ноговицына, Дьааҥы улууһун бэрэстэбиитэлэ: «Биһиги Дьааҥы улууспутугар сокуон барылын дьокутааттар сэбиэттэригэр аҕыйах хонуктааҕыта эмиэ ырытан ааспыппыт. Бэйэбит этиилэрбитин бэлэмнээбиппит».

Алтынньы ыйга сокуон барыла киириэҕиттэн олохтоох бэйэни салайыныы уорганнарыгар тарҕанан турар. Онон элбэх киһи саҥа сокуон тула санаатын этэр, тиэрдэр кыатаммыта. Маныаха саҥа сокуоҥҥа уустук боппуруоһунан  улуус, нэһилиэк баһылыктарын саҥа ньыманан талааһыны, анааһыны чопчулааһын ылар.

Алексей Еремеев, Ил Түмэн бэрэссэдээтэлэ: «Биһиги улууспутугар Ил Дархан этиитинэн представительнай уорган талааһынын. Онтон миэстэлэригэр нэһилиэктэргэ дьокутааттар талыыларын өйөөтүбүт».

Киин болҕомтону саҥа сокуоҥҥа боломуочуйаны биэрээһин хайысхата ылар, ол курдук ким-тугунан дьарыктаныахтааҕа, туохха эппиэттээҕэ, үп-харчы тыырыытын боппуруоһа сытыы. Муньахха хас биирдии улуус, партия бэрэстэбиитэлиттэн элбэх этии киирдэ, санаа атастаһыыта буолла.

Владимир Колосов, Амма улууһун депутаттарын сүбэтин салайааччы: «Истиҥ кэпсэтии буолла диэххэ наадалаах. Бэйэбит санаабытын эттибит. Боппуруостарбытын барытын ыйытан, киллэриилэрбитин киллэрдибит. Владимир Михайлович комитета биһи этиилэрбитин барытын ылыныа диэммит эрэнэбит».

Сана сокуонунан олохтоох бэйэни салайыныы уорганнарын боломуочуйалара кэҥиирэ күүтүллэр.

Владимир Прокопьев, Ил Түмэн олохтоох бэйэни салайыныыга кэмитиэтин салайааччы: «Сокуон 2027 сыллаахха киириэхтээх. Быйыл ыллахпытына улуустарбыт, нэһилиэктэрбит устааптарыгар уларытыы киллэрэр кыах үөскүүр. Эһиил 60-тан тахса сокуоҥҥа уларытыы киллэрэрбитигэр бириэмэ баар буолар».

Ил Түмэҥҥэ сокуон бастакы ааҕыыта, ол эбэтэр сүнньэ бу ый бүтүүтэ, сэтинньи 26 күнүгэр көрүллэн ылыллыахтаах. Салгыы иккис ааҕыытыгар бириэмэ ананан бу сыл бүтүөр диэри бүтэһик ааҕыытыгар ылыллыахтаах.