Хатас нэһилиэгэр буойуна сыаҕа аһылынна

Хатас нэһилиэгэр буойуна сыаҕа үлэлээбитэ аҕыйах хонно. Дьокуускай эргин бу соҕотох аан бастакы ынах-сүөһүнү астыыр сыах аһыллан үлэ күөстүү оргуйар. 200 кв.м. иэннээх тэрилтэҕэ сүөһүнү ас буолан бэлэмнээн таһаарарга бары услуобуйа баар.

Иван Баишев, сыах үлэһитэ: «Тириитин сүлэн баран ыйыыбыт, онно иһэ хостонор, эрбэнэр. Онтон туспа камераҕа сойор уонна тоҥо тахсар».

Барыта автоматизированнай буолан биир сүөһнү астааһын ортотунан 30-тан тахса 40 кэриҥэ мүнүүтэни ылар, онон түргэн. Сыах күннээҕи кыаҕа 10 сүөһүнү астааһын буолар. Буойуна аһыллыбыта аҕыйах хонно, ол эрээри кэтэх дьоннортон номнуо сакаас ылан 40 сүөһүнү, сибиинньэни астаан бэлэмнээтилэр.

Иван Сивцев, "Баҕарах" хаһаайыстыба салайааччыта: «Улахан болҕомтону чааһынай хаһаайыстыбаларга уурабыт. Куоракка буойуна туруорсубуппут ыраатта. Тыа хаһаайыстыбатын министиэристибэтэ уонна мэрия көмөлөһөн сыах тутулунна».

Сыах 7 үлэһиттээх, хас биирдии киһи эбээһинэһэ тус-туһунан. Ким тириини сүүлэр, ким эттир, ким иһи ырытар. Уу-хаар быыстала суох кэлэ турар буолан, иһи сууйан-тараан барытын тус-туһунан иһитинэн наардыыллар.

Саргылаана Баишева, сыах үлэһитэ: «Мин иһи араарабын. Сүрэҕэ, быара, тыҥатын барытын араарабыт. Иһин кыраан уутунан сууйабыт».

Өрөспүүблүкэ үрдүнэн бүгүҥҥү күҥҥэ 108 убойнай пуун регистарцияламмыт, ол онтон билигин 73-һэ үлэтин саҕалаан олорор. Саамай элбэх буойуна Хаҥалас уонна Мэҥэ-Хаҥалас улуустарыгар баар. Ол эбэтэр хас биирдии бөдөҥ хаһаайыстыба бэйэтэ сүөһүнү астыыр сыахтаах. Быйыл Саха сирин үрдүнэн уопсайа 570-тан тахса туонна ынах-сүөһү этин, 198-тан тахса туонна сылгы соҕотуопкалыахтара.

Дмитрий Филиппов, СӨ ТХМ астыыр-үөллүүр бырамыысыланнаска салаатын салайааччытын солбуйааччы: «Буойунай пуун биһиэхэ астыыр-үөллүүр эйгэҕэ уонна ас-үөл куттала суох буолуу эйгэтигэр саамай сүрүн оруоллаах буоллаҕа. Сүөһү, сылгы хайаан да буойунаҕа өлүөхтээх диэн нэһилиэнньэҕэ куруутун этэбит».

Баҕарах хаһаайыстыба буойунатын сыаҕа салгыы территориятын кэҥэтэн, тоҥ эт ыскалаатын кэҥэтэр соруктаах. Мантан инньэ сыах идэһэ сезонун кэмигэр  алтынньы ыйтан ахсынньы ыйга диэри толору кыаҕынан үлэлиэҕэ.