Суол-иис үлэһиттэрэ күн ахсын хаары ыраастааһын түбүгэр сылдьаллар

Бу киин Октябрьскай уокурук дворниктара Дьокуускайдааҕы 17 нүөмэрдээх оскуола аттыгар баар Илья Винокуров пааматынньыгын киэҥ территориятын ыраастыы сылдьаллар. Уопсайа 7-8 дворник сарсыарда 8 чаастан саҕалаан араас эбийиэктэринэн үлэлиир. Мэҥэ-Хаҥалас улууһуттан төрүттээх Иннокентий Сивцев дворнигынан үлэлээбитэ аҕыйах ый буолла.  Иннокентий Петрович үйэтин тухары физкультура учууталынан үлэлээбит буолан салгыҥҥа хамсанар үчүгэй диэн этэр.

Иннокентий Сивцев, Октябрьскай уокурук тиэргэни ыраастааччыта: «Таһырдьа сылдьан үлэлиирбин сөбүлүүбүн. Ол иһин управаҕа киирбиппиттэн киэн туттабын. Сибиэһэй салгыҥҥа сылдьабын, хамсанар үлэ эбит. Хаарбыт быйыл кыра соҕус, гынан баран саҥа кэлэр буолуо, онно биһи хамаанда бэлэммит».

Сарсыарда эрдэттэн сиппиир, харбыыр, күрдьэх тутуурдаах дворниктар ыраастыыр учаастактарыгар мусталлар. Хаар син кэлэн үлэ биллэ эбилиннэ. Уулуссалар кытыыларыгар сатыы сылдьар дьон сирдэрин тэҥэ, муниципальнай дворниктар болуоссаттары, сквердэри, общественнай сирдэри хаартан, бөхтөн ыраастыыллар.

Анатолий Стручков, Октябрьскай уокурук тиэргэни ыраастааччыларын биригэдьиирэ: «Хаарбыт чараас, баччаларга халыҥ буолааччы. Үлэбит үчүгэйдик баран иһэр. Сарсыарда 8 чаастан үлэбит чааһа саҕаланар».

Маннык хас биирдии уокурук дворниктара бэйэлэрин территорияларын көрөллөр-истэллэр, ыраастыыллар. Оҕо былааһааккаларын бөҕүн эмиэ хомуйаллар. Салгыы бу сквер кэннэ атын сирдэригэр тиийэн эмиэ хаары кытта үлэлиэхтэрэ.

Сүрүн үлэ биир үксүн улахан тиэхиникэ көмөтүнэн ыытыллар. Үлэһиттэр суол кытыытыгар хаары мунньан бэлэмнээн биэрэллэр.

Гаврил Семёнов, суол тэрилтэтин үлэһитэ: «Тротуардары, болуосаттары хомуйабыт. Үлэ элбэх».

Хаары ыраастааһын бары уулуссаларга, тохтобулларга, общественнай сирдэргэ, болуоссаттарга барар. Полигоҥҥа тиэллэр хаар кээмэйэ икки бүк эбилиннэ.

Александр Павлов, суол тэрилтэтин салайааччытын көмөлөһөөччүтэ: «Ааспыт бээтинсэҕэ 900 м³ хаар түспүтэ. Билигин 1880 м³ хаар буолла».

Сэтинньи ый саҕаланан кыһыммыт сыыйа тымныытын күүһүгэр киирэн эрэр. Түүнүн биллэ тоҥорор. Мантан кыһын хаар элбээтэҕинэ үлэ өссө эбиллиэ турдаҕа.