Дьокуускайга оскуола оҕолоругар харантыыны уһаттылар

Мария Дмитриева: «Дьокуускай куорат уокуругун санитарнай эпидемияны утары хамыыһыйатын быһаарыытынан үөрэх тэрилтэлэригэр 1 кылаастан 11 кылаастарга диэри  харантыын сэтинньи 11 күнүттэн 15 күнүгэр диэри уһаата. Хааччах үөрэх бары тэрилтэлэригэр, ол иһигэр куруһуохтарга, спортивнай секцияларга, оскуола кэннэ эбии дьарыктарга барытыгар биллэрилиннэ. Маннык миэрэ дьаҥ ыарыытын көрдөрүүтэ үрдүү турарыран ылылынна».

Ол курдук Роспотребнадзор кэтээн көрүүтүнэн бүтэһик нэдиэлэҕэ Саха сиригэр 10850 тахса киһи ыалдьара биллэр. Бу алын көрдөрүүнү 78% куоһарар.

Валентина Григорьева, Роспотребнадзор Саха сиринээҕи салалтатын эпидемиологическай кэтээн көрүү салаатын салайааччытын солбуйааччы: «Ол иһигэр Дьокуускай куоракка 7261 киһи, эпидпорогу 68% аһарар. Оскуола оҕолоругар эпидпорог 40% үрдүк билигин даҕаны. Дьокуускай куорат курдук бүтүннүү барбыт оройуон суох. Оскуолаларга 20% оҕо суох буоллаҕына кылааһынан, эбэтэр учрежденияҕа оҥороллор. Оройуоннарга барыларгыар ОРВИ баар».

Ордук элбэх киһи Дьокуускай куоракка ыалдьар. Онон киин куорат балыыһалара киэһэ хойукка диэри үлэлииллэр, сорох медицинэ тэрилтэлэригэр эбии быраастары, биэлсэрдэри туруордулар. 3 №-дээх поликлиникаҕа куорат соҕуруу өттүн бүтүннүү кэриэтэ сылдьар. Дьаҥнаабыт дьону суһал көмө салаатыгар көрөллөр.  Биир бырааска күҥҥэ ортотунан 40 тахса киһи киирэн тахсар.

Ульяна Афанасьева, Дьокуускайдааҕы 3№-дээх балыыһа терапевт бырааһа: «Сарсыарда 08:00 чаастаан киэһээ 20:00 диэри дьоннору көрөбүт. 4 быраас үлэлиир. Оҕо салаата туспа киирэр сирдээх, туспа хостоохтор. Ыарыһахтар үксүн грииптээн кэлэллэр уонна ОРВИ».

Оттон үрдүк температуралаахтар дьиэҕэ бырааһы ыҥыраллар. Манна аҥаардас 3 поликлиникаҕа күҥҥэ улахан дьоҥҥо 200 тахса, оттон оҕолорго 300 тахса ыҥырыы киирэр.

Ыарыы намырыырыгар оскуола оҕолорун харантыын кэмигэр уопсастыбаннай сиргэ сылдьыыларын төрөппүттэр хонтуруоллуулларын  сүбэлииллэр. Ордук киинэ тыйаатырдарыгар, атыы-эргиэн дьиэлэригэр, аһыыр сирдэргэ тоҕуоруһуу бобуллар. Бары илиини элбэхтэ сууна сылдьары уонна  харыстыыр маасканы кэтэллэрин этэллэр.