Тулаайах кыталык оҕотун Дьокуускайга исписэлиистэр көрүстүлэр

Долгутулаах көрсүһүү бастакы мүнүүтэлэрэ. Икки кэриҥэ ый буолан баран Усуйаана улууһугар булуллубут кыталык оҕото киин куорат аэропордун таһаҕаһы көрсөр терминалыгар көтөн кэллэ. 

Сэдэх таһаҕаһы көрсөөчүллэр Саха сирин биологическай ресурсаларын дирекциятын исписэлиистэрэ уонна Орто дойду зоопаркатын үлэһиттэрэ. Анал дьааһыгы сэрэхтээх буолуу быраабылатынан арыйбатылар. Быыһынан көрөн, кыталык оҕото этэҥҥэ туруктааҕын сыаналаан салгыы зоопаркалар массыыналарыгар ыраахтан көтөн кэлбит айылҕа оҕотун тиэйдилэр.

Уһун киэҥ айаны көрсөн кыталыкпыт Орто дойдуну булар. Дьааһыгыттан тахсан саҥа олорор сирин үөрэппитинэн барар.

Гаврил Иванов, СӨ үлэни салайыыга, экологическай сырдатыыга уонна ураты харыстанар айылҕалаах сирдэргэ департаменын салайааччытын солбуйааччы: «Усуйаана туундаратыгар булбуттара. Алтынньы 25 күнүгэр. 120 км курдугу буранынан айаннаан сөмөлүөккэ тириэрдибиттэрэ».

Исписэлиистэр этэллэринэн кыталык олус үчүгэй төрөппүт. Оҕотун хаһан да бырахпат, олус үчүгэйдик көрөн-истэн улаатыннарар. Онон сабаҕалааһын быһыытынан бу кыталык оҕотун дьоно өлбүт буолуохтарын сөп. Айылҕа оҕотун Удьуор диэн сүрэхтээбиттэр, булбут община аатынан. Исписэлиистэр сыанабылларынан кыталык оҕото туруга этэҥҥэ.

Саргылана Михайлова, СӨ биологическай ресурасалар, ураты харыстанар айылҕалаах сирдэр уонна аан айылгылар дирекцияларын салайааччытын солбуйааччы: «Быйылгы оҕо, сөптөөх сайдыылаах. Холобура, ыстаадаҕа олордоҕуна зоопаарка үлэһиттэрэ, орнитологтар тугунан аһатыахха сөбүн игин сүбэлээн биэрбиттэрэ».

Бу курдук өлөр быаттан быыһанан, уһун айаны көрсөн кыталык барахсан олорор сирин булла. Билигин кинини биир ый ымпыктаахтык көрүөхтэрэ-харайыахтара.

Наталья Сафонова, "Орто Дойду" зоопарка салайааччыта: «Впервые стерх, обнаруженный в природе, прилетает в зоопарк. Будет проходить реабилитацию. Обычно это карантинные мероприятия в течение месяца».

Онтон манна даҕатан эттэххэ, салгыы кыталык оҕотун дьылҕатын биһиги биэриибит биллэрэ-көрдөрө олоруога.