Анал байыаннай дьайыыга былдьаммыт тиэхиньикэ быыстапката турда

“Эһиги иннигитигэр Украина тиэхиньикэтэ турар. Бу сэрии көлөтүн 2022 сыллаахха ылары ситиспиттэрэ. Оттон бу тиэхиньикэ Дьокуускай куоракка кэлэн турар”, - Анастасия Добрянцева, корреспондент.

“Рэдли", "Буцефал", "М -113", "ВАБ", "Х", "А-180" арҕаа дойдулар анал байыаннай дьайыы кэмигэр былдьаппыт тиэхиньикэлэрэ киин куоракка дьон дьүүлүгэр турда. Таһырдьааҥҥы экспозиция илиҥҥи байыаннай уокурук өйөбүлүнэн тустаах түмэлгэ "Фашизмы утары" пуорум чэрчитинэн арыллынна.

Владимир Егоров, "Россия -моя история" түмэл үлэһитэ: "Барыта 5 тиэхиньикэ кэллэ. Бу бастакы турар американецтар көлөлөрө “Рэдли” диэн ааттаах. Салгыы финнэр тиэхиньикэлэрэ турар. Итини сэргэ европаттан кэлбит көлө турар. Бу балар бары иҥнигэһэ суох айанныыр кыахтаахтар. Оттон бу бэһис тэхиньикэ эмиэ американецтар киэннэрэ. Маны өссө Вьетнамы кытта сэриигэ тутта сылдьыбыттара".

Маннык өстөөхтөр байыаннай тиэхиньикэлэрин быыстапката аан бастакытын Саха сиригэр турда. Холобур, Финнар "ИКС-180" бронетранспортёдара Соҕуруу-Донецкай хайысхаҕа биһиги "Восток" байыаннай группировктынан ылыллыбыта. 

"Саамай бас-көс миэстэни “Алеша” тааҥка ылар. Биһиги уолаттарбыт алдьархайдаах сэриигэ сылдьыбыт тиэхиньикэлэрин Дьокуускай куоракка ким баҕар кэлэн көрүөн сөп", - Анастасия Добрянцева, корреспондент.

"Алеша" тааҥка чопчу ханыыта бэйэтин таһыгар үгүс дьону түмэр. Саха сиригэр икки дьоруойу аҕалбыт, кыайыыны уһансыыга улахан кылаатын киллэрэ сылдьар тааҥканы ким баҕалаах кэлэн көрүөн сөп.

Пуорум чэрчитинэн байыаннай суруналыыстар Ирина Ким уонна  Сергей Гелашвили кэллиэгэлэрин кытары көрүстүлэр, маастар-кылаастарын биэрдилэр. 

Ирина Ким, Илиҥҥи байыаннай уокурук байыаннай - политическай салалтатын кэпсиир-сырдатар салаатын сүрүн офицера, байыаннай суруналыыс: "Сэриигэ сылдьааччылар уонна тыыл иик ардынааҕы ыкса сыһыаны көрдөрөргө кыһалынныбыт. Бу пуорум иитинэн олус суолталаах хайысха".

Быйылгы 3 төгүлүн ыытыллар пуорум "Армия уонна норуот биир сомоҕо" диэн ааттанан  үүнэн эрэр эдэр көлүөнэҕэ ийэ дойдуга тапталы, бэриниилээх буолууга, маныаха байыастарбытын уонна нэһилиэнньэни чугаһатыыга туһуланна

3 күннээх тэрээһин байыаннайдары да гражданскайдары да чахчы биир сомоҕо гынна. Бу хайысхаҕа үгүс үлэ ыытыллынна.