Модукка тойон муҥха

Билигин муҥха кэмэ.  Эбэ барахсан бу сылга тугу мичик гынарын билэ, Күөх Боллох бэлэҕин ыла үгүс дьон тоҕуоруһар. Нам улууһун биир ытык сиригэр Модукка эмиэ муҥха дьоро күннэрэ.

Оттоохтор диэн ааттаах эбэ кэлбит ыалдьыттарын матарбата.  Модут ытык сиригэр муҥха дьоро күнэ ыраахтан-чугастан үгүс дьону түмтэ.  Муҥха былыр былыргыттан саха дьонун түмэр, сомоҕолуур булт биир  көрүҥэ.

Бэһис сылын муҥхаҕа анньыыһытынан сылдьар Николай Ядрихинскай бүгүҥҥү күнү өр кэтэспитэ. Сибиэһэй, көй салгыҥҥа күөх боллох тугу мичик гынарын көһүтэ-көһүтэ үлэлиир туохха да тэҥнэспэтин үллэстэр.

"Убайдаатар убайдарбыт биһигини үөрэтэн, муҥха кистэлэҥнэрин билэбит. Төрүт дьаоыгы баччааҥҥа диэри илдьэ кэллибит. Ким баҕалаах кэлэр, кими да үүрбэппит", - диэн Николай Ядрихинскай, Модут олохтооҕо кэпсиир.

Муҥха бастакы түһүмэҕэ туона анньыы буолар.  Балыксыттар икки кынакка арахсан үтүмэҕи бэчимэ быаҕа баайан муус аннынан ыыппытынан бараллар.  Манна саамай сүрүнэ муҥха иэнин, уһунун сөпкө учуоттаан түһэрии. Бу түгэҥҥэ тус-туспа кынаттар, иккиэн биир тэҥҥэ үлэлиэхтээхтэр. Куота түһүү,  хаалаан хаалыы суох буолуохтаах. Барыта суоруллубат сокуон. Маннык таһымнаах муҥхаҕа аан бастакытын сылдьар Николай Дьяконов үөрүүтэ үгүс.

Николай Дьяконов, Нам улууһун олохтооҕо: "Улахан муҥхаҕа бу бастакыбын сылдьабын. Үөрэнэ таарыйа кэллим. Урут дьон кэпсээниттэн эрэ истэрим, устууларга көрөрүм. Дьэ туох хайдах буоларын бу көрөн үөрэнэ сылдьабын".

Кэрэ аҥаардар эмиэ хаалсыбаттар. Эр дьону кытары тэбис тэҥҥэ, хахсаат тыалы ахсарбакка  туох баарынан көмөлөһөллөр. Модут олохтооҕо Наталья Иванова сыллата муҥхаҕа сылдьар, кини сахаларга өбүгэ саҕаттан кэлбит  кыстыкка киирии бырааһынньыгар сылын аайы үөрэ-көтө кэлэр эбит.

Наталья Иванова, Модут олохтооҕо: "Бары тоҕуоруһа мустан дьон-сэргэ сынньана таарыйа муҥхалыырбыт наһаа үчүгэй".

Муҥха түспүтэ 2 чаас кэриҥэ ааһан, саамай күүтүүлээх түгэн тосхойор. Тэрээһин бас-көс дьоно ийэ муҥханы тардан саҕалыыллар.Хас эмэ мүнүүтэ орооһун түмүгэр эбэ тугу күндүлээбитин көрөбүт. Күөх Боллох оруннаахтык мичик гынан, көмүс хатыктаах хамсыы-хамсыы тахсар. Тутатына хаар күрдьүллэн, сибиэһэй соболору хаарга тарҕатыллар.

Ефим Гоголев, Модут нэһилиэгин баһылыга: "Нэһиэкпитигэр 30-ча күөллээхпит. Олортон сыллата 10-чалыы күөлү тардабыт. Бу күөллэрбитин харыстыыр уонна дьону-сэргэни үлэҕэ үөрэтэр сыалтан. Ыччаттарбытын аҕалтыы сатыыбыт. Ыччаттарбыт кэлэн үлэни ыытыахтаахтар".

Сыралаах үлэ түмүгэ - Күөх Боллох мичик гыммытын муҥхаһыттар дьиэлэригэр илдьэн, бу киэһэ сип-сибиэһэй балыгы сандалы остуолга ууруохтара. Модукка бүгүн киэһэ собо дьоро киэһэтэ.