Биллиилээх муосчут Георгий Родионов айар быыстапката турда

Төрөөбүт дойдуну дьүһүйүү эриэккэс түһүмэхтэрэ. Бииртэн биир хатыламмат ураты айымньылары көрөн фольклор уонна саха норуотун түҥ былыргы остуоруйатын сюжеттара Георгий Родионовка ордук чугастара арылхайдык көстөр. Ол курдук сэлии муоһугар олоҥхо көстүүлэрэ, дьөһөгөй оҕото, иччилэрбит тиллэллэр.

Сардаана Посельская, СӨ Ойуулуур-дьүһүннүүр бас түмэлин социальнай уонна култуурунай алтыһыы салаатын сэбиэдиссэйэ: "Бу Георгий Николаевич үлэлэригэр, аҥаардас Арктика уобарастара эрэ буолбакка, саха норуотун култууратын, майгытын-сигилитин көрдөрөр үлэлэр бу быыстапкаҕа турдулар". 

Георгий Николаевич оҕо сааһа Эдьигээн улууһугар ааспыта. Онон хоту дойду тыына кини айар үлэтигэр биир сүрүн миэстэни ылар. Бу быыстапка  уратыта диэн түмэл пуондатыттан эрэ буолбакка, урут киэҥ көрөөччүгэ тарҕамматах бэйэтин коллекциятыгар баар айымньылара турдулар.

"Быыстапка киин экспонатынан олус уустук уонна сэдэх оҥоһуулаах “Кыайыы батаһа” диэн айымньы буолар. Манна биһиги тимир уонна муоһу дьүөрэлии тутан, урукку сэрии сэбин аныгылыы тыыннаан сөргүтүүнү көрөбүт. Бу үлэни Георгий Николаевич Кыайыы 50 сылыгар анаан оҥорбута ", - Мария Дмитриева, корреспондент.

Быыстапкаҕа уопсайа 100 тахса оҥоһук  турда. Георгий Николаевич бүтэһигин бар дьонугар 10 сыл анараа өттүгэр айымньыларын көрдөрбүтэ. Онон кини айар үлэтин сэҥээрээччилэр быыстапка арылларын кэтэһэ сылдьан тута кэлбиттэр.

Ирина Мекумянова, худуоһунньук: "Быыстапка олус сөхтөрдө. Тоҕо диэтэр мин эрдэ сорох үлэлэрин көрө илигим, төһө да мастарыскыайбыт ыаллыы турдар. Киһи кэрэхсиир быыстапката. Георгий Николаевыһы үбүлүөйүнэн эҕэрдэлиибин". 

Маны тэҥэ аҕа көлүөнэ муосчут уһулуччу үлэрин үүнэр көлүөнэ сыныйан көрөр. Егоровтар дьиэ кэргэнинэн анаан-минээн кэлбиттэр. Кырачаан киһи ордук түҥ былыргы носоруогу сэҥээрбит.

Анна Егорова, көрөөччү: "Наһаа үчүчгэй үлэлэрдээх эбит, олус интэриэһинэй быыстапка, ураты үлэлэр. Оҕобут бэйэтэ уруһуйдуур, онон олус сэҥээрэн көрдө".

Талааннаах муосчут олох эдэр эрдэҕиттэн сэлии муочун чочуйар. Кини  Дьокуускайдааҕы художественнай училищены бүтэрбитэ. Уһуйааччылара Семен Пестерев уонна Николай Амыдаев, курдук үрдүк ааттаах-суоллаах муосчуттар.

Алексей Томский, көрөөччү: "Кинини уруккуттан билэбин. Бу үлэлэри билэбин. Ону өссө төгүл кэлэн көрбүппүттэн астынан аҕай сылдьабын". 

Бэйэтэ ураты буочардаах, талааннаах муосчут, дэгиттэр маастар айар быыстапката Ойуулуур-дьүһүннүүр түмэлгэ кэлэр сыл саҥатыгар диэри туруоҕа.