Саха норуотун аудиовизуальнай нэһилиэстибэтин сыыппараҕа көһөрүү тэтимнээхтик барар

Бу саха норуотугар олус сэдэх уонна сүдү суолталаах грампластинка. Манна аатырбыт олоҥхоһут, норуот ырыаһыта Үстүүн Нохсоороп ырыалара сурулла сылдьар. Библиотекарь Василий Моисеев олус дириҥ ис хоһоонноох идэлээх. Кини бу билигин оҥорбут үлэтэ үйэлэргэ хараллар.

Василий Моисеев, СӨ Национальнай библиотекатын  сыыппара киинигэр библиотекарь: «Икки өттүттэн устабыт. Ол кэннэ көмпүүтэргэ киллэрэбит уонна сайтка угабыт, онно бары киирэн истиэхтэрин сөп».

Национальнай библиотека пуондатыгар сүүһүнэн бу курдук устуулар, толоруулар харалла сыталлар. Эрдэ уһун уочарат, сакаастаһыы кэннэ ылан истэр буоллахтарына. Билигин сыыппараҕа тиһиллибит библиотека сайтыгар көҥүл туһаныыга баар. Онон ким баҕалаахха саха норуотун аудиовизуальнай нэһилиэстибэтэ аһаҕас. 

Манна биллэр-көстөр бөдөҥ учуонайдар үлэлэрэ хараллар. Ол иһигэр сүрдээх баай историялаах хаартыскалар, устуулар бааллар. Холобур, аҕыйах ахсааннаах хотугу норуоттар олохторун чинчийбит история билимин дуоктара Глафира Василевич ааспыт үйэ саҥатыгар экспедицияҕа сылдьан түһэрбит хаартыскаларын альбома. 

Анна Таппырова, СӨ Национальнай библиотека сэдэх кинигэлэри үөрэтии, чинчийии салаатын сэбиэдиссэйэ: «Бу сылдьар кэмнэригэр сүрдээх интириэһинэй, норуокка үксүн биллибэтэх буоллаҕа. Маннык 12 альбом баар».

Национальнай библиотекаҕа харалла сытар аудиовизуальнай нэһилиэстибэни киэҥ араҥаҕа сырдатар сыаллаах тэттик роликтары, документальнай киинэлэри  оҥорор. Сүрүн режиссер Иван Кривогорницын Алексей Окладников туһунан киинэ устар. Манна сэдэх хаартыскалар, докумуоннар киириэхтэрэ. 

Иван Кривогорницын, СӨ Национальнай библиотека медиа киинин сүрүн режиссера: «Учуонайдары көрбүт, истибит уонна билигин архыыпка дөкүмүөннэр арыый чөл, үчүгэй көрүҥнээхтэр. Ол иһин билигин туттан инники кэнэҕэски көлүөнэҕэ тириэрдээри үлэлии сылдьабыт».

Бу үтүмэннэх үлэ Саха сирин култууратын нэһилиэстибэтин сыыппараҕа тиһии чэрчитинэн ыытыллар.