ХИФУ "Саха тыла судаарыстыбаннай салайыы эйгэтигэр" диэн үөрэтэр кууруһу саҕалаата

Саха тыла судаарыстыбаннай салайыы эйгэтигэр. Куурус үөрүүлээх аһыллыытыгар төрүт тылбыт дьыала тылыгар сөптөөхтүк уонна табыгастаахтык туттуллуутугар салайар эйгэ дьоно, бастатан туран, дэгиттэр баһылыахтаахтарын тоһоҕолоотулар. Бу сырыыга 27 тэрилтэттэн 50 тахса киһи төрүт тылга уһуйулла кэлбит.

Гаврил Торотоев, ХИФУ Хотугулуу-Илиҥҥи норуоттар тылларын уонна култуураларын үнүстүүтүн дириэктэрэ: «Саха тыла иккис судаарыстыбыннай тыл быһыытынан эмиэ туттуллуохаах, киириэхтээх диэн. Ол үлэ салҕанан бара турар. Холобура, Ил Түмэҥҥэ билигин сокуоннарбыт икки тылынан киирэллэр. Онон сахалыы үчүгэйдик билэр буолуохтаахтар. Дьокутааттарбыт даҕаны, салайааччыларбыт даҕаны, көннөрү нэһилиэнньэ даҕаны. Онон, маннык куурустары ыытаммыт, салайааччылар кэмпитиэнсийэрин, ол аата сатабылларын, үөрүйэхтэрин, билиилэрин кэҥэтэбит».

Манна судаарыстыбаннай, муниципальнай сулууспа уонна Ил Түмэн, Ил Дархан салалтатын аппараатын үлэһиттэрэ саха тылын салайыы эйгэтигэр туһаныыларын үрдэтэ кэлбиттэр. Лариса Атласова Хаҥалас улууһун Уулаах Аан нэһилиэгин уһуйаанын сэбидиссэйэ. Кини эрдэ уһуйаан тылдьытын оҥорууга кыттыспыт. Онон бу эйгэҕэ саха тыла сайтыыдыгар быһаччы интэриэстээх буолан кууруска үөрэнэ кэлбит.

Лариса Атласова, уһуйаан сэбиэдиссэйэ: «Ини барытын үөрэтэр уобаластарынан наардаан, күннэтэ туттуллар диэн. Оҕолорго да үөрэтиэххэ сөп, атын исписэлиис туттар тыла диэммит наардаан оҥорбуппут. Уһуйаан диэн тылы сорохтор “детсад” диэни тутуһаллар. Ону биһи уһуйаан диэҥҥэ тохтообуппут».

Куурус нэдиэлэ устата салҕаныа. Онон биир да мүнүүтэни мүлчү туппакка дьарыктар саҕаламмытынан бараллар. Бастатан туран сахалыы дьыала истиилин уратытын билиһиннэрииттэн саҕаланар. Онтон салгыы  дьыала истиилин тылын-өһүн, сахалыы тиэрмини оҥоруу, сахатытыы уонна  тэрилтэ аатын сөпкө суруйуу, тиэкис тылбааһын оҥоруу курдук сытыы тиэмэлэргэ киириэхтэрэ. Бу тэрээһин тыл судаарыстыбаннай бырагырааматын чэрчитинэн ыытыллар.

Сергей Местников, СӨ Бырабыыталыстыба бэрэссэдээтэлин солбуйааччы: «Дөкүмүөн толоруутугар биһи төрөөбүт тылбытынан эмиэ туһаныахтаахпыт, саҥарыахтаахпыт, кэпсэтиэхтээхпит уонна суругу-бичиги суруйуохтаахпыт. Ону таһыммытын үрдэттэхпитинэ эрэ биһиги төрөөбүт тылбытын харыстаан инники көлүөнэҕэ хаалларыахпыт».

Сыл устата уопсайа 5 куурус ыытыллыа. Кэлэр дьарык сэтинньи ыйга саҕаланыа.