Дьокуускайга үгэскэ кубулуйбут "Саха сирин балыга" дьаарбаҥка ааста

Атыы-тутуу үгэнэ. Маннык эт эгэлгэтин, балык сибиэһэйин, элбэҕин балык дьаарбаҥкатыгар эрэ көрөҕүн. Сыл ахсын Саха сирин балыга атыы-эргиэн дьаарбаҥкатыгар хоту улуустартан анаан-минээн бэйэлэрин бородууксуйаларын атыылыы кэлэллэр. Бу Усуйаана хаһаайыстыба атырдьах, балаҕан ыйдарыгар балыктаабыт балыга.

Васияна Горохова, "Усуйаана" ТХПК атыыһыта: «Балтараа киилээлээхтэр. Киилэтэ 550 солк. Билигин чэпчэкигэ атыылыы турабыт».

Өрөбүл күннэргэ Хомсомуол болуоссата кыһыҥҥы хаһаас ас, балык киинигэр кубулуйда. Уҥа көр - ынах этэ, хаҥас-убаһа этэ, иннин хоту- балык эрээтэ. Холобура бу Кэбээйи улууһун аатырбыт Ньидьили эбэтин көмүс хатырыктааҕа.

Сардаана Ноговицына, атыыһыт, Кэбээйи улууһа: «Барыта биир күөл. Алыһар, сордоҥ уонна собо. Сибиэһэйдии уонна тоҥнуу бааллар. Сибиэһэйи ордук ылаллар уонна сордоҥу».

Собо киилэтэ 450, алыһар 150, сордоҥ 300 турар. Атыыһыттар этэллэринэн сыана былырыыҥҥыттан улаханнык уларыйбатах. Орто сыана биир кэм турар. Быйыл күһүҥҥэттэн ырыынакка күндүөбэй балык сыаната үрдээбит, онтон бу дьаарбаҥкаттан 310 солкуобайга атыылаһар кыах баар.

Чиир киилэтин 550 солкуобайга, уомулу 470,тугуногу маннык кыра иһитин балтараа кэриҥэ тыһыынчаҕа атыылаһыахха сөп. Тамара Ксенофонтова Эдьигээн улууһуттан кэлэ сылдьар, быйыл балыктааһын көрдөрүүтэ мөлтөх диэн этэр.

Тамара Ксенофонтова, атыыһыт, Эдьигээн улууһа: «Быйыл балык мөлтөх. Халлааммыт тыал эбэтэр ардах бөҕө».

Ынах этин 800 солкуобайтан, убаһа 900 саҕаланар, миэстэнэн ылыахха сөп. Ону тэҥэ, сибиэһэй таба этин дьон хамаҕатык ылар. 

Евдокия Ладина, атыыһыт, Эдьигээн улууһа: «Сыана 400 саҕаланар. Тыл, быар баар, барыта сибиэһэй».

Дьаарбаҥкаҕа эти-балыгы таһынан, полуфабрикаттары, араас бородууксуйаны эмиэ ылыахха сөп.