Сыллата кыыл таба таһаарар хоромньутун аччатыыны торумнууллар

Биир түүн иһигэр бүттүүн ыстаада табата суох хаалла. "Өлөөн" МУП 900 төбөлөөх ыстаадатын кыыл таба кэлэн илдьэ барда. Манна өссө биир кыһалҕа табалар кэннилэриттэн бөрө үөрэ батыспыт.

Артём Винокуров, "Өлөөн" хаһаайыстыба дириэктэрэ: "Халлаан хараҥарда эрэ бөрө киириитэ наар баар. Билигин да ыстаадаларгатан бөрө баар уонна табаны сүгүннээбэт диэн тыллабыр киирэ турар. Биир ыстаадабытыгар бөрө сүгүннээбэккэ биир да табата суох хаалларан ыксалга киллэрэ сырыттылар".

Уопсайынан бу табалаах хаһаайыстыбаларга бөрө уонна кыыл таба киириитэ билигин сытыы кыһалҕа. Баччаларга табаһыттарга ордук уустук кэм саҕаланар. 900 дьиэ кыыла биир күн иһигэр сүтэн хаалара диэн бу хаһаайыстыбаҕа эрэ буолбакка бүттүүн улууска, өрөспүүбүлүкэҕэ улахан хоромньу буолар. Билиҥҥитэ ыстаада табалара сүттэхтэринэ барыта табаһыт эрэ үрдүнэн барар. Манна анаан үп-харчы көрүллүбэт. Адьырҕа кыылы кытта охсуһарга эмиэ балаһыанньа уустук.

Елена Голомарёва, норуот депутата: "Билигин сокуонунан дьаат көҥүллэммэт, бөрөтөлүөккэ үп көрүллүбэт. Аны табаны страховкаҕа ылбаттар".

Онон билиҥҥитэ хоту дойду мааны кыылын харыстыыр сокуонунан бырайыак суох. Арай олох сайдыытын кытта, бу хоту улууска үлэлиир-хамныыр улахан хампаанньалар көмөлөһөн үбүлээтэхтэринэ, аныгы дроннары уонна табаҕа иилиллэр чиптээх моойторуктары ылан табаһыттар дьиэ кыылларын көрө-истэ сылдьыа этилэр. Билигин үс министиэристибэ тэҥҥэ үлэлэһэн кыыл таба сылдьар сирин  уларытар туһунан кэпсэтиини ыыттылар.

Иннокентий Баланов, : "Сылдьар сирдэрин уларытыахха наада. Тоҕо диэтэр кыыл бэттэх киирэн чорбоҥнуур буолла даҕаны төптөрү кэлиэҕэ. Красноярскай кыыла урут саамай элбэҕинэн ааҕыллара. Урут 1 мөлүйүөн этилэр. Билигин аҕыйаабыттар. Учуонайдар ааҕыыларынан 150 тыһыынча кыыл баар диэн ааҕаллар. Оччо да ахсааннаах таба киирдэҕинэ, Өлөөн улууһугар 5 тыһыынча эрэ таба турар, биир күнүнэн сотон ааһыан сөп. Онон сылдьар ыырдарын  уларытыахпытын наада".

Оттон бу кыыл таба илдьэ барбыт 900 дьиэ табатын барытын төнүннэрдилэр. Бу улуус дьаһалтата, депутат Елена Голомарева уонна үс министиэристибэ суһаллык быһаарыныы ылынаннар, "Алмазы Анабара" хампаанньа утары баран бөртөлүөт көтүтэн үс күн иһигэр ыстаада бары табаларын буллулар. Бу биир эрэ түбэлтэ, оттон маннык быһыы-майгы хаһан баҕар өссө хатыланыан сөп. Онно бэлэм буоларга саҥа быһаарыныы ылыллара наада.