Сунтаар оскуолатын оҕолоро "Кулун кугас аттаах Куллустай Бэргэн" олоҥхону туруордулар

Дьэрэкээн көстүүмнэр, турукка киллэрэр ырыа-тойук, үҥкүү-битии. Кырачаан артыыстар улахан сыанаҕа Сергей Зверев Кыыл уола "Кулун кугас аттаах Куллустай Бэргэн" олоҥхотугар олоҕурбут испиктээкили көрдөрөллөр. Сүрүн оруолу Сунтаардааҕы политехническай лиссиэй 6 кылааһын үөрэнээччитэ Дэвид Васильев толорор. Үүнэн эрэр көлүөнэ артыыһа Куллустай Бэргэн оруолун бэрт итэҕэтиилээхтик оонньуур, туойар да үҥкүүлүүр даҕаны.

Дэвид Васильев, сүрүн оруолу толорооччу: "Күн Оҕолдьун Куо убайа, көмүскээччитэ  буолабын. Мин  3 кылаастан дьарыктанабын, ыллыыбын, туойабын, олоҥхолуубун. Ити олохтоохтук ылсан дьарыктаныым. Уһуйаан сааспар эмиэ ыллыы-туойа сылдьыбытым. Мин икки олоҥхону билэбин, бу “Куллустай Бэргэни” уонна “Ньурбун Боотур".

Испиктээкилгэ оонньуур оҕолор бары фольклор куруһуогар сылдьаллар. Үгүстэрэ уһуйаан саастарыттан ыллыыллар-туойаллар. Хас биирдиилэрэ бэйэ баҕа өттүнэн олоҥхону ылсан үөрэтэллэр.

"Олоҥхоһуттар уутуйан үөскээбит Сунтаар улууһугар оҕолору кыра эрдэхтэриттэн уһуйаллар. Фольклор куруһуогар 2 кылаастан саҕалаан 40-ча оҕо дьарыктанар", - Ирена Осипова, корреспондент. 

"Кулун кугас аттаах Куллустай Бэргэн" олоҥхону Сунтаар норуодунай тыйаатырын режиссера туруорбут. Бастаан улахан дьон, тыйаатыр артыыстара толорбуттар. Онтон Сергей Зверев үбүлүөйдээх сылынан бу оҕолорго эмиэ туруоран холоммуттар.

Татьяна Заровняева, Сунтаардааҕы норуот тыйаатырын режиссёра: "Өссө уһуйаан бөлөхтөөхпүт. Уһуйааны түмүктүүр оҕолор сылын аайы испиктээкил туруораллар. Туруоруу остуоруйаларга олоҕурар. Онно аан дойду остуоруйаларын талан ылан тылбаастаан, сценарий суруйан туруорабын. Бу үгэс 16-с сылыгар барда".

"Сунтаар - олоҥхо дойдута" диэн дэлэҕэ эппэттэр. Манна бу уһуйаан саастан оҕолорго олоҥхо алыптаах эйгэтигэр сыһыараллар. Оттон бу Сергей Зверев аатынан култуура киинигэр фольклор куруһуога, оҕолор эрэ буолбакка ким баҕалаах бары сылдьыан сөп. Улахан дьону үөрэтэр оһуохай, хомус, олоҥхо куруһуоктара үлэлииллэр.

Алексей Седалищев, Сергей Зверев - Кыыл Уола аатынан Сунтаардааҕы норуот айымньытын киинин дириэктэрэ: "Биһиэхэ барыта 30 тахса түмсүү баар. Онно 700 тахса киһи дьарыктанар. Ол курдук икки норуодунай коллективтаахпыт. Владимир Николаев аатынан норуодунай тыйаатыр уонна “Түһүлгэ” фольклорнай үҥкүү ансаамбыла". 

Онон Сунтаар улууһугар  саха култууратын, үтүө үгэһин күн бүгүҥҥэ диэри илдьэ сылдьаллар. Эдэриттэн эмэнигэр тиийэ култуурабыт баайын өрө туталлар.