Саҥа сүүрээн: үүт боруоданы тутуу

Ынахтар саҥа сиргэ үктэммиттэрэ нэдиэлэттэн орто. Онон кыралаан үөрэнэн эрэллэр. Ленинград уобалаһыттан 11 күн устата сиринэн айаннаан этэҥҥэ кэлбиттэр. Манна алта араас боруода баар.   Бары өлгөм үүтү биэрэр көрүҥнэр. Онон саҥа хотон  иһэ күө-дьаа.

Саҥа тэриллибит "Солоҕон Ас" хаһаайыстыба кэтээн көрүүгэ диэн үүт боруодалары аҕалтаабыт. Олор истэригэр Блэк Ангус диэн аан дойдуга аатырбыт бургер кэтилиэтин оҥорор мрамор эттээх сүөһү кытта баар. Оттон бу үүтүн сыатынан саха сүөһүтүгэр маарынныыр  Джержи боруода.

Мэхээс Масаха, тыа хаһаайыстыбатын көҕүлээччи: "Алта араас боруода ынахтары аҕаллыбыт үрдүк үүккэ диэн уонна кэтээн көрүүгэ. Аччаабыта 5 туонна үүтү ситиһиэхтээхпит хас биирдии ынахтан. Ол курдук сүрүннүүр боруодалар Айширдар. Олор былырыын Маҕараска кэлбиттэрэ уонна бэйэлэрин үчүгэйдик көрдөрдүлэр, чахчы Саха сиригэр тулуйан олоруохтарын сөп эбит диэн. 16 ынаҕы көрөн, төрөтөн уопуппутун саҕалыахтаахпыт. Барытын дьоҥҥо сырдатабыт, барытын таһаара туруохпут".

Ити курдук Горнай улууһун Солоҕонугар тэриллибит хаһаайыстыба кыһыннары сылы эргиччи үүт тутуутун саҕалыа. Итиэннэ кэлэр ыйтан соҕотуопакалаан барыа.

Павел Трофимов, "Солоҕон-Ас" хаһаайыстыба дириэктэрэ: "Ол оҥорон таһаарбыт үүппүтүн Дьокуускай куоракка атыыга таһаарыахтаахпыт. Ыраах сытар нэһилиэктэн маннык үлэни ыытыахха сөп диэн бэйэбит холобурбутунан көрдөрүөхпүтүн баҕарабыт“.

Оттон бу Мэҥэ Хаҥалас улууһугар "Тарат" кэпэрэтиип саҥа хотонун үөрүүлээх аһыллыыта.  100 төбөҕө анаммыт. Улууска тэриллибит граанынан 65 сүөһүнү атыылаһан быйыл онтулара бары төрөөн, иккис хотону үлэҕэ киллэрдилэр. Сүөһү кыстыыр сирэ аныгылыы тииптээх, механизированнай, үлэһиттэргэ усулуобуйа толору тэриллибит.

Петр Петров, "Тарат" хаһаайыстыба бэрэссэдээтэлэ: "Бэйэбит киэнэ төбөтүнэн 110-ча буолла. Ону таһынан чааһынайдар киириэхтэрэ.  Быйыл былаан быһыытынан 200 сүөһүнү кыстатан таһаарыахтаахпыт. Биһиги үүккэ, эккэ диэн иитэбит, барытын “Хоту” кэпэрэтиипкэ туттарабыт".  

Хаһаайыстыба бэйэ хороҕор муостааҕы тэнитэрин таһынан нэһилиэк дьонун сүөһүтүн кыстатар үтүө соруктаах. Инньэ гынан Араҥас нэһилиэгэр төбө ахсаана эбиллэр.

Дмитрий Максимов, Араҥас нэһилиэгин олохтооҕо: "Аҕыйах да буоллар биэрэн олоробут. Онон саастаах дьоҥҥо олус үчүгэй. Кэпэрэтиип маннык тэтимин ыһыктыбакка салгыы сайдан истин диэн баҕарабын".

Саҥа хаһаайыстыбалар төбө ахсаанын элбэтиигэ, соҕотуопкаҕа туһулаан арыллаллар. Онон оҥорон таһаарыы кээмэйин элбэтиигэ дьоһун хардыы оҥоһуллар.