Дьокуускайга кэнсиэрбэ сыаҕа арылынна

Саҥа сыахха бэлэм эт кэнсиэрбэлэрэ кэчигириһэн тураллар. Мантан ыла эт уонна оҕуруот аһыттан кэнсиэрбэлэр бу сыахха оҥоһуллуохтара. Маны таһынан сыахха сир аһыттан араас минньигэс барыанньаллары, сироптары уонна мүөтү  оҥоруохтара. Саҥа сыах күҥҥэ 4 тыһыынчаттан тахса кэнсиэрбэни аһы оҥорор былааннаах.

Людмила Емельянова, сыах сүрүн технолога: "Үлэбит автоклавтан тутулуктаах, төһө элбэҕи буһарар да үлэбит кээмэйэ тахсан кэлэр. Биир угууга 1,5 тыһыынча бааҥка киирэрэ. 4 чаас устата буһарар. Бастакы симиэнэҕэ 1,5 тыһыынчаны, оттон иккискэ 3 тыһыынчаны буһарыахпын сөп буолар. Свекольник, рассольник, щи киирэр уонна сугун, отон барыанньалара, сироп баар буолар".

Саҥа сыах оборуудабанньата барыта саас кэлбитэ, сайын устата тустаах исписэлиистэр кэлэн  таҥан, үлэҕэ ыытан, үлэһиттэри үөрэтэн,  билигин сыахха үлэ күөстүү оргуйар. Манна үлэһиттэр икки симиэнэн үлэлиэхтэрэ. Күн бүгүн сыахха уонча үлэһит баар.

Денис Фёдоров, сыах инженерэ: "Хас биирдии оборуудабанньабыт тус туһунан туруоруулаах. Ону биһиги билигин көрүүгэ ылан үлэни тэрийэбит. Борордууктабытын миэстэтигэр соҕотуопкалаан таһаарабыт".

Өрөспүүбүлүкэ салалтата хоту уонна Арктика улуустарын аһынан-үөлүнэн, социальнай суолталаах бородууктанан хааччыйыыны сүрүн болҕомтоҕо уурар. Бу саҥа сыахха сылга эт кэнсиэрбэтин 250 тыһыынча бааҥканы, оттон  оҕуруот, сир аһыттан кэнсиэрбэни 120 тыһыынча устууканы оҥорон таһаарар былааннаахтар.

Айсен Николаев, СӨ Ил Дархана: "Манна олохтоох дьон туттарбытыттан эбэтэр хаһаайыстыбалар бородууксуйаларыттан оҥоһуллан тахсар. Ол аата тыабыт сирин дьоно мантан эмиэ туһаналлар. Манна оҥоһуллан тахсыбыт бордууксуйа бастакы уочарат хоту уонна Арктика улуустарыгар тириэрдиллиэ. Онтон салгыы Дьокуускай куоракка уонна атын да улуустарга баар буолуо диэн биһиги эрэнэбит".

Бу Саха сиригэр бастакы уонна улахан суолталаах кэнсиэрбэлэри оҥорон таһаарар сыах буолар. Инникитин сыах оҥорон таһаары бородууксуйатын көрүҥүн уонна кээмэйин элбэтэр былааннаах.