Суол үлэһиттэрэ ыкса ситимнээхтик үлэлииллэрин биллэрдилэр

Нам улууһуттан сылдьар суол-иис тутуутугар, көрүүтүгэр-харайыытыгар баай уопуттаах Алексей Федоров Саха сирин суол тутааччыларын сойууһуттан өр сыллаах, таһаарыылаах үлэтин иһин түөскэ кэтиллэр бэлиэнэн наҕараадаланна. Алексей Степанович төрөөбүт Намын улууһугар үөрэҕи бүтэриэҕиттэн маастартан саҕалаан кылаабынай инженергэ тиийэ үүнэн үйэ аҥаара кэриҥэ кэм үлэлээн кэллэ. Нам улууһугар аан бастакы аспаал собуотун оҥорон үлэтэтэн, улууска 20 килэмиэтир суолу аспааллаан турар. Билигин даҕаны Алексей Степанович үлэ үөһүгэр сылдьар.

Алексей Фёдоров, "Суол" тэрилтэ дириэктэрэ: "Кыттыһаммыт суолу көрүүгэ анаан “Уйгу-быйаҥ” диэн тэрилтэ тэриммиппит. Итиэннэ Дьокуускай – Нам уонна Сагаарга тиийэ үллэстэн көрөбүт". 

Бу курдук Суол хаһаайыстыбатын үлэһиттэрин күнүн көрсө Дьокуускайга өрөспүүбүлүкэтээҕи суол үлэһиттэрин сойууһугар мунньах буолла. Үөрүүлээх тэрээһиҥҥэ суол салаатыгар үлэлээбит бэтэрээннэргэ наҕараадалары туттардылар. Саха сирин суол тутааччылара түмсэн аан бастакытын сойуус тэринэн, биир кэлим сибээстээх үлэлииллэрин биллэрдилэр. Маныаха тэрээһиҥҥэ кинилэргэ өйөбүллэрин биллэрэн  бырабыыталыстыба бэрэссэдээтэлин бастакы солбуйааччы Дмитрий Садовников, Ил Түмэн спикерэ Алексей Еремеев кытыннылар.

Дмитрий Садовников, СӨ бырабыыталыстыба бэрэссэдээтэлин солбуйааччы: "Билигин суол хаһаайыстыбатыгар кэккэ кыһалҕалар бааллар. Ордук үп-харчы өттүгэр. Төһө да ыархан буоллар суол үлэһиттэрэ идэлээх күннэрин кэккэ ситиһиилэрдээх көрсөллөр".

Ситиһиилэр бу кэнники сылларга бааллар диэн этиэххэ наада. Дойду национальнай бырайыагын чэрчитинэн сүүһүнэн килэмиэтир суол тутуллан, оҥоһуллан, өрөмүөннэнэн нуормаҕа эппиэттиир буолла.  Улуустарга уонна киин куоракка үлэ сыллата күөстүү оргуйар. Быйыл "Олоххо-дьаһахха аналлаах инфраструктура" барыл иитинэн быйыл Саха сирин үрдүнэн 124 килэмиэтир суол оҥоһулунна. Онтон 15 килэмиэтирэ Дьокуускайга. Киин куоракка былаан ситтэ.

Евгений Григрьев, Дьокуускай куорат баһылыга: "Быйылгы сыллааҕы үлэни кытта холбуу ылан көрдөххө Дьокуускай суолларын 85% нуормаҕа эппиэтиир буолла. Ол буолар сүрдээх улахан көрдөрүү. Тоҕо диэтэр 2019 сыллаахха национальнай бырайыак саҕаланарыгар суолбут нормативка 33 % этэ".

Сыллата суолу саҥардыы үлэтэ Дьокуускайга киэҥ далааһыннаахтык барар. Хабаров, Ойуунускай уонна Сэбиэскэй Армия 50 сыла уулуссаларга саҥардыы кэлэр сылларга түмүктэниэҕэ.