Өлүөнэ муостатын биир сүрүн чааһын үлэтэ түмүктэннэ

Өлүөнэни туоруур муоста тутуутугар өссө биир сүрүн суолталаах хаҥас өттүттэн бастакы тирэх турда. Омос көрдөххө бетонтен кутуллан оҥоһуллубут олус улахана суох тутуу. Ол эрэн бу ирбэт тоҥҥо чиргэллик тайанар уустук инженернэй айыы.

"Өлүөнэни туоруур муоста 4№-дээх тирэҕэ толору бэлэм буолбут. Тирэх 20-40 миэтэр уһуннаах 18 сыбаайаҕа турар. Муоста тутуллан бүттэҕинэ бу тирэх толору буорунан көмүллүөҕэ уонна суолу кытта силбэһиэҕэ", -Мария Дмитриева, корреспондент.

Бастакы сыбаайа оруобуна биир сыл анараа өттүгэр үөрүүлээх быһыыга-майгыга анньыллыбыта.

Сыл устата күүстээх үлэ муоста улахан тирэхтэрин тутар коффердам диэн ааттанар чааһын оҥорууга барда. Бу баараҕай тутуу өрүс түгэҕэр тимирдиллэн, 120 миэтэрэ уһуннаах сыбаайалары тутуохтаах.  Оччоҕо муоста Өлүөнэ хайа баҕар күүстээх сүүрүгүн, өрүс барыытын тулуйуохтаах. Онон маннык коффердам  муостаны тутууга киһи аймах саҥа айыыта. Бу  технология хаһан да ханна да туттулла илигэ.

Михаил Акимов, "ВИС Строй" тэрилтэ оҥорон таһаарар техническэй салаатын салайааччыта: "Киин тирэх коффердамын таҥыы бара турар. Итини сэргэ сыбаайа каркаастарын бэлэмнии сылдьабыт. Түөрт тирэхтэн үс тирэх сыбаайаларын бүтэрдибит. 75 сыбаайа барыта түһэриллэн бэлэм турар. 4№-дээх тирэҕи толору бүтэрдибит".

Итини сэргэ уу аллара кэлэн тиксэр сирин оҥоруу тэтимнээхтик барар. Тута миэстэтиттэн тиэйии-таһыы олохтонноҕуна үлэ тэтимириэхтээх. Уопсайынан манна үлэ хас да былаһааккаҕа арахсан ыытыллар. Ол курдук бетон собуота, арматура оҥорор сыах, сыбаайа түһэрии, тирэх оҥоруу, коффердам таҥыы. Итини сэргэ уҥа кытылга мантан итэҕэһэ суох үлэ барар.

Антон Крупнов, "ВИС Строй"  тэрилтэ тутуу үлэтин дириэктэрэ: "Уҥа кытылга билигин сыбаайалары түһэрии тэтимнээхтик барар. Анараа өттүгэр 36 сыбаайа түстэ. Ол аата икки өттүн кытта холбоон 107 сыбаайа анньылынна. Федеральнай суолтан муоста тирэҕэр диэри суолу быйыл оҥордубут. Маны оҥорууга ойууру кэттибит уонна 329 тыһыынча куб кумах кутулунна".

Тымныы түһүөр диэри коффердамнары ууга тардан киллэрэр лебедка туруоруутуа түмүктэниэ. Аны саас эбэ мууһа барда эрэ уһуннаран илдьэн туһааннаах имэстэтигэхр түһэриэхтэрэ. Отоон иккис улахан коффердам таҥыыта муус устарга түмүктэниэ. Онон клэр сайыны баттаһа эмиэ өрүскэ түһэрэри былаанныыллар.