Дьокуускайга 1 нүөмэрдээх оскуола дьиэтин тутуута бүтэр уһугар тиийэн эрэр

Саҥа оскуола тутуута көхтөөхтүк ыытыллар. Сарсыардаттан киэһээҥҥэ диэри үлэ күөстүү оргуйар. Бүгүҥҥү күҥҥэ тутуу 70% бэлэм. 4 этээстэх 253 миэстэлээх таас оскуола тутуута ааспыт сылтан саҕаламмыта. Билигин улахан үлэтэ толору бүтэн, саамай ымпыктаах-чымпыктаах түһүмэҕэ саҕаланна. Сарайын итиини тутар матырыйаалларынан бүрүйэн бүтэн эрэллэр. 

Альберт Пудов, фасады оҥороччу: «Сейчас по мелочи осталось. Осталось стены покрыть панелью, цоколь и всё».

Маны тэҥэ ис оҥоруутун үлэтэ барар турар. Ол курдук штукатуркалыыллар, муостатын уурарга бэлэмнииллэр. Кафель уурааһына, кирилиэһи оҥоруу, сварка үлэтэ тигиниир. Уопсайа сүүсчэкэ киһи үлэлии-хамныы сылдьар. 4 этээһинэн спорт, актовай сааллар, кабинеттар дьэндьэйиэхтэрэ. 

Эдуард Соркомов, тутар тэрилтэ прораба: «Билиҥҥи туругунан 98 киһи үлэлии сылдьар. Уонна 4 тиэхиникэ баар. Билигин тас үлэтэ бара турар. Ону кытта ис үлэлэр бара тураллар. Сылытыы ситимэ бүтэн эрэр».

Сотору кэминэн штукатурка, кырааскалааһын, ааннары туруоруу түбүгэ үүнүөҕэ. Аны икки-үс ыйынан бу үлэ үмүрүйэн, хомуйуу, сууйуу-сотуу, салгыы киэргэтии, оскуола миэбэлин, оборудованиетын туруоруохтара. Билигин оскуола үөрэнээччилэрэ уруккута атыы-эргиэн коллеһын дьиэтигэр үөрэнэ олороллор. Оскуола барыта 700-чэкэ үөрэнээччилээх.  Онон саҥа дьиэлэрин үөрэнээччилэр даҕаны, учууталлар даҕаны долгуйа күүтэллэр.

Надежда Васильева, Дьокуускайдааҕы 1N-дээх оскуола дириэктэрин иитэр үлэҕэ солбуйааччы: «Оскуолаҕа улахан спорт саалата баар буолар, хомойуох иһин остолобуой уонна аактабай саалата суох буолар. Улахан бибилэтиэкэ баар буолар. Сүрүн сыалбыт – медицинскэй хайысханнан бараары гынабыт».

Оскуола аны кыһын тохсунньу ыйга толору бэлэм буолуохтаах. Салгыы докумуоннары ситиһии үлэтэ барыаҕа. 

Татьяна Николаева: «Саҥа үөрэх кыһата кэлэр үөрэх дьылыгар 2026 сылга аанын тэлэччи аһыаҕа. Оскуолаҕа чуолаан алын сүһүөх кылаастар уонна 10, 11 кылаас үөрэнээччилэрэ, барыта икки сүүстэн тахса оҕо икки сменаҕа архсыбакка, биир симиэнэҕэ үөрэнэрэ күүтүллэр».