Дойду үрдүнэн түөс искэҥин ыарыытын утары охсуһуу нэдиэлэтэ барар

Араас дьэрэкээн өҥүнэн суруллубут айылҕа кэрэ көстүүтэ. Бу ыарахан ыарыыны кытта охсуһар итиэннэ үтүөрбүт кэрэ аҥардар хартыыналара. Арт-терапия диэн бу аан дойду үрдүнэн киэҥник тарҕаммыт науканан дакаастаммыт киһи уйулҕатын уоскутар, туругун тупсарар дьарык буолар. Онкологическай диспансерга бу маннык ньыма терапияҕа ордук болҕомто уураллар. Пациеннар эмиэ сөбүлээн дьарыктаналлар.

Надежда Эртюкова: "Антирак" уопсастыбаннай хамсааһын кыттыылааҕа: «Саамай сөбүлүүр тэрээһиммит – арт-терапия. Биһиэхэ ити дьарыгы сөбүлээбэт ким да суоҕа буолуо. Онно кэлэн уруһуйдуу олордоххуна туох баар куһаҕаны барытын умнаҕын, наар үчүгэйи эрэ саныыгын».

Дойду үрдүнэн билигин түөс искэҥин ыарыытын утары охсуһуу нэдиэлэтэ ыытыллар. Аан дойдутааҕы доруобуйа харыстабылын тэрилтэтэ бэлиэтииринэн, аан дойду үрдүнэн хас биирдии 7-с дьахтар аймах бу ыарыыны кытта охсуһар. Арассыыйаҕа сыллата уонунан тыһыынча кэрэ аҥарга бу ыарыыны булаллар. Ол эрэн, сыллата медисиинэ сайдан үгүс киһи үтүөрэр дьолу билэр.

Феодосия Иванова, РФ үтүөлээх бырааһа, СӨ доруобуйа харыстабылын министиэристибэтин сүрүн онколог-бырааһа: «Саамай үчүгэйэ диэн бу ыарыыттан өлүү ахсаана кыралаан аччыыр. Ити барытын туоһулуур бу онкологическай сулууспа үчүгэйдик үлэлиирин. Бу саҥа Онкологическай кииммит кыаҕа даҕаны үчүгэй буолла. Билигин толору хааччыллан бу ыарыына эрдэ буларга сүрдээх улахан күүс-көмө буолла».

Онон билигин улахан аҥаара ыарыһах өрөспүүбүлүкэттэн ыраах айаннаабакка миэстэтигэр эмтэнэр кыахтанна. Ордук болҕомтону быраастар ыарыыны эрдэттэн сэрэтиигэ уураллар. Онон онкопоиск, скрининг үлэтэ тэтимнээхтик барар. Маныаха ыарахан эпэрээссийэни ааһан эмтэнэн бүппүт, үтүөрбүт дьоҥҥо эмиэ болҕомто ууруллара наада. Онно анаан номнуо хаһыс да сылын Антирак диэн уопсастыбаннай хамсааһын үлэлиир.

Капитолина Алексеева, "Антирак" уопсастыбаннай хамсааһын салайааччыта: «Хамсааһыммытыгар игин араас диагнозтаах дьоннор бааллар. Ону бэйэ-бэйэбитин кытта сүбэлэһэн, көмөлөһөн. Бэйэҕитигэр тутан кистээн олорбокко, саҥарын, кэпсэтин уонна биһи уопсастыбабытыгар кэлиҥ».

Бу тэрээһиннэри тустаах хамсааһын тэрийэн ыытар. Ыалдьыбыт, санааҕа ылларбыт дьоҥҥо көмө буоллун диэн. "Антирак" хамсааһыҥҥа киириэн баҕалаахтар куйаар ситимин нөҥүө антирак диэн сайты булан киириэхтэрин сөп.