Саха сиригэр норуоттар икки ардыларынааҕы "Үрүҥ хаар алгыһа" диэн поэзия бэстибээлэ саҕаланна

"Үрүҥ хаар алгыһа" норуоттар икки ардыларынааҕы поэзия бэстибээлэ быйыл 8-с төгүлүн ыытыллар. Бэстибээл 2012 сылтан саҕалаан икки сылга биирдэ буолар. Манна араас дойдуттан биллэр бэйиэттэр, суруйааччылар, тылбаасчыттар биир сиргэ түмсэллэр. Бу сыллар тухары истин доҕордоһуу сыһыанна олоҕуран араас хайысхалаах үлэ ыытыллан кэллэ.

Наталья Харлампьева, Саха норуодунай бэйиэтэ, Саха сирин суруйааччыларын сойууһун бэрэссэдээтэлэ: «Кэпсэтэн, билсэн. Бу дьоннору кытта кинигэ бэлэхтэһэн, атастаһан. Ким баҕар кэлэн кэпсэтэн, доҕордоһуон сөп. Ол буолар бу бэстибээл сүрүн суолтата. Уопсайынан, хайа баҕарар суруйааччы бэйэтин омугун эйгэтигэр хаайтарар буоллаҕына, кини үрдүк таһымҥа тахсыбат».

Бэстибээлгэ Кытайтан, Монголияттан, Бразилияттан, Ирактан, Казахстаантан, Татарстаантан уонна Арассыыйа регионуттан ыалдьыттар кэллилэр. Үгүс ыалдьыттар үрүҥ хаар алгыстаах Сахабыт сиригэр аан бастаан кэлбиттэр.

Ван Цзяньчжао, бэйиэт: «Якутия как миф, но сегодня миф стал реальностью. И теперь я тоже живу в мифе. Это душа зимы, как поэзия — тоже душа человечества».

Поэзия бэстибээлэ саха литературатын сайдыытыгар ураты улахан суолталаах буолар. Бу күннэргэ ыалдьыттар Саха сирин олоҕун-дьаһаҕын, дьонун-сэргэтин, ыччатын кытта алтыһыахтара, ураты култууратын, үтүө үгэстэрин кытта билсиһиэхтэрэ.

Владимир Терёхин, бэйиэт: «Главная ценность Якутии — это, прежде всего, люди, а люди у вас замечательные, талантливые, развивающиеся. И я надеюсь, что здесь мы встретим новых знакомых, что это будет своеобразная точка отсчета для нашего будущего развития. Мы должны встречаться, переводить друг друга, общаться, создавать новые фестивали, новые проекты».

Бүгүн ыалдьыттар Горнай улууһугар Семен, Софрон Даниловтар төрөөбүт дойдуларыгар айанныахтара. Оттон сарсын национальнай библиотекаҕа Хабыланды Баатыр диэн казах эпоһын сахалыы тылбаастаммыт кинигэтин сүрэхтэниитигэр кыттыыны ылыахтара.