ГИМС инспиэктэрдэрэ чараас мууска сэрэхтээх буолуу рейдэлэрин саҕалаатылар

Саҥа турбут күөлгэ оҕолор холкутук киирэн туралларын көрөн ГИМС иниспиэктэрдэрэ тута онно түһүнэллэр. Икки алын кылаас оҕолоро атах суола баарын көрөн киирбиттэрин этэллэр. Иниспиэктэрдэр баччаларга олус кутталлаах кэмин өйдөттүлэр уонна сэрэттилэр. Уолаттарга мууска сэрэхтээх буолуу иһитиннэриитин туттардылар.

Кырдьык да күөл устатын тухары атах суола толору. Манан сылыктаатахха дьон куттаммакка күөлгэ киирбитэ быданнаабыт. Таалай күөл кытыытын хомуйар Сүргэн Баах чараас мууска киирбит оҕолору күн устата буойарын үллэстэр.

Сүргэн Баах, дворник: «Сорох сирэ аһаҕас уулаах. Ийэлэрэ, аҕалара баар буолаллар уонна тураллар».

Киһини уйар муус 7 см буолуохтаах. Онтон массыына айанныырыгар көҥүллэнэр муус халыҥа 30 см. Уу эбийиэгин улэһиттэрэ бу быраабыланы, күөл таһыгар хаама сылдьар дьоҥҥо-сэргэҕэ кэпсээтилэр, өйдөтөр-такайар кумааҕылары түҥэттилэр.

Татьяна Степанова, ЫБММ СС салалтатын ууга куттал суох буолуутун хааччыйар салаатын салайааччытын солбуйааччыта: «Муус араастаан тоҥорун умнуман. Бу кэмнэргэ ГИМС инспектордара уу эбийиэктэрин кэрийэллэр, муус халыҥын кээмэйдииллэр, холбоһуктаах риэйдэлэри ыыталлар. Нэһилиэнньэни кытта кэпсэтии уонна оскуолаларга уроктары ыыталлар ».

Билигин ГИМС үлэһиттэригэр үлэ икки бүк үрдээтэ.  Бу күннэргэ иниспиэктэрдэр куорат эргин күөллэри бүтүннүү кэрийэн нэһилиэнньэҕэ сэрэтэр үлэ ыыталлар. Быыһааччылар чуолаан оҕолору кытта мууска киирбэттэрин, итиэннэ ууга түспүт буоллахтарына хайдах быыһаналларын туһунан бэсиэдэлэри ыыттыллар.

Дарья Дордосова, ЫБММ дьоҕус суудуналарга судаарыстыбаннай иниспиэктэрэ: «Если человек провалился, к нему толпой на помощь не подходить. К проему близко подходить не надо. Надо выходить из воды в том направлении, по которому пришли, там наверняка лед выдержал, значит, там он наиболее толстый».

Билигин бу быыһык кэмҥэ саамай кутталаах араҥа  - оҕолор. Онон төрөппүттэр болҕомтоҕутун күүһүрдэн, дьиэҕитигэр эмиэ бэйэҕит өйдөтүү ыытаргыт тоҕоостоох диэн иниспиэктэрдэр тоһоҕолоон этэллэр.