АГАТУ сиртэн салайыллар аалы көтүтэр оператор идэтигэр аан бастакы куурус түмүктэннэ

Салайар тэрилинэн сымсатык туттан курсаннар дроннары көтүтэллэр. Балтараа ыйдааҕы үөрэх түмүгүн таһаарар эппиэтинэстээх эксээмэн. Устудьуоннар да уһуйааччылар да долгуйаллар. Агротехнологическай университет иккис кууруһун устудьуона Максим Охлопков дрону көтүтэр оператор идэтэ билигин олох араас хайысхатыгар баарын билэн бу үөрэҕи ааспыт.

Максим Охлопков, Арктикатааҕы судаарыстыбаннай агротехнологическай университет 2 кууруһун устудьуона, анал байыаннай дьайыы кыттыылааҕа: «Элбэҕи биллим, СВОҕа дрон ыытар этим даҕаны, эбии элбэҕи биллим».

Тустаах кууруска уопсайа 50 устудьуон үөрэннилэр. Дойду тыа хаһаайыстыбатын министиэристибэтин судаарыстыбаннай хантраагынан тэриллибит анал куурус буолар. Эбии үөрэхтээһин быһыытынан ыытылынна. Ол эбэтэр, устудьуоннар үрдүк үөрэхтэрин таһынан өссө эбии оробуочай идэни баһылаатылар.

Марфа Филимонова, Арктикатааҕы судаарыстыбаннай агротехнологическай университет үөрэх салаатын салайааччыта: «Биһиги усутудьуоннарбыт үлэһит быһыытынан үрдүк таһымнаах буолалларыгар маннык эбии үөрэхтээһини ыытабыт. Билигин тыа хаһаайыстыбатыгар маннык көтөр аппараттары ыытар үлэһиттэр ирдэнэллэр».

Пилота суох көтөр аалы салайар оператор идэтигэр АГАТУ устудьуоннарын Омскайдааҕы агротехнологическай университет уһуйааччылара кэлэн үөрэттилэр. Дроннары көтүтэр оператор тыа хаһаайыстыбатын салаатыгар билигин биир ордук наадалаах исписэлиис буолла. Дойдубут аграрийдара пилота суох көтөр ааллары хаһаайыстыбаларыгар хамаҕатык туһаналлар.

Александр Гарагуль, Омскайдааҕы агротехнологическай университет доцена: «Здесь эта отрасль применима в большей степени, чем в других регионах. При помощи беспилотных систем можно мониторить сельхоз угодья, можно наблюдать за выпасом животных».

Онон тыа хаһаайыстыбатын сайдыытыгар бу дроннар күүс-көмө буолуохтара. Оттон онно анаан үөрэхтээх исписэлиистэр бэлэмнэр.