Саха сиригэр социальнай гаастааһын иитинэн онус тыһыынча дьиэҕэ күөх төлөн киирдэ

Элбэх оҕолоох Охлопковтар дьиэ кэргэҥҥэ үөрүүлээх түгэн. Саҥа киэҥ-куоҥ дьиэлэригэр күөх төлөн киирдэ. Эдэр ыал бу сайын малааһыннаабыттар, уонна бу балаҕан ыйыгар гааска холбоннулар. Онон толору хааччыллыылаах, сылаас дьиэҕэ кыстыкка үктэннилэр.

Вадим, Нюргуяна Охлопковтар, Хатас нэһилиэгин олохтоохторо: «Сайабылыанньабытын олунньуга туттарбыппыт. Балаҕан ыйын саҕана үлэлэр саҕаламмыттара уонна ый бүтэһигэр холбообуттара. Бэдэрээччит уолаттар кэлэн түргэн баҕайытык барытын оҥорон, холбоон биэрбиттэрэ».

Хатас нэһилиэгин олохтоохторо Вадим уонна Нюргуяна Охлопковтар Саха сиригэр онус тыһыынчанан гааска холбоммут дьиэ кэргэн буолаллар. Ол курдук, социальнай гаастааһын бырагырааманан бу 10 тыһыынча дьиэҕэ күөх төлөн киирдэ. Бэлиэ сыыппаранан гааска холбоммут дьиэ кэргэҥҥэ Ил Дархан Айсен Николаев ыалдьыттаата.

Социальнай гаастааһын бырагыраама Саха сиригэр үлэлээбитэ бастакы 5 сыла буолла. Бу сыллар тухары өрөспүүбүлүкэҕэ күөх төлөн ситимин тардыы муҥутуур сыыппараҕа тиийдэ. Хас да тыһыынчанан дьон босхо гааска холбонно.

Оттон бу бэрт соторутааҕыта Мэҥэ-Хаҥалас Лоомтука нэһилиэгэр күөх төлөн ситимэ киирбит үөрүүлээх түгэнэ. Манна ааспыт сылга Петровка сэлиэнньэтиттэн  15 км усталаах гаас ситимэ тардыллыбыта. Күн 28 дуогабар түһэриллэн олохтоохтор дьиэлэригэр гаас киирдэ. Оттон бу иннинэ Сыымах нэһилиэгэ күөх төлөн ситимигэр холбоммута.

Антон Томский, “Сахатранснефтегаз” тэрилтэ гаас ситимин тарҕатар салалтатын салайааччыта: «2021 сылтан 6 нэһилиэк гаастанна бырагыраама чэрчитинэн. Ол таһынан 2 улахан нэһилиэк: Чурапчы уонна Бэрдьигэстээх гаастааһына түмүктэннэ. Социальнай гаастааһын бырагыраама иһинэн 616 км гаас ыытар ситимэ тардыллынна».

Онон социальнай гаастааһын бырагыраама олоххо киирэн күн бүгүн 10 улуус нэһилиэктэригэр итиэннэ киин куоракка 10 тыһ тахса дьиэҕэ гаас киирдэ. Ордук элбэх биллэн турар Дьокуускайга, улуустарынан Чурапчыга 1983 уонна Горнайга 1167 ыал күөх төлөн ситимигэр холбонно.