Саха сиригэр күһүн быйыл уһаата

Алтынньы ый ортолоон эрэр, ол эрэн сорох кустар сылаас дойдуга кыстыкка көтө иликтэр. Тустаах исписиэлиистэр этэллэринэн кэнники сылларга маннык түбэлтэ үксээтэ, төрүөтэ дьыл-кэм уларыйыыта, итиэннэ дьон дьалаҕай сыһыаныттан.

Владимир Решетников, СӨ булт департаменын салайааччыта: «Сайсары күөлүгэр 20-чэ кус сылдьар. Иитиэх кустары инник ыытар эппиэтэ суох сыһыан буолар. Муус халыҥаатаҕа тутан көрүөхпүт. Уонна кус иитэр дьоннорго батаран көрүөхпүт».

Быйыл Саха сиригэр күһүн уһаата. Сылаас, ичигэс күннэр хаһаанытааҕар да өр турдулар. Урукку кэмнэ кустар-хаастар алтынньы саҕаланыыта сылаас дойдуга кыстыкка көтөр буоллахтарына, билигин хойуут көтөллөр.

Онтон Саха сиригэр кыһын тымныыта биллэн эрэр. Тымныы салгын күнүһүн да биллэр буолла. Күнү-дьылы кэтээн көрөөр сулууспа иһитиннэрэринэн бу күннэргэ түүнүн 8-10 кыраадыс тымныйыаҕа.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: «Саамай халыҥ хаар 20-25 см Өлөөн, Эдьигээн, Дьааҥы улуустарыгар уонна Алдаҥҥа сытта. Кэлэр күннэргэ илин Сибиир циклона хотугу уонна Халыма-Индигиир оройуоннарыгар хаардаах күнү дьылы аҕалыаҕа. Өрөспүүбүлүкэ үгүс оройуоннарыгар кыралаан хаардыа. Температура түүнүн -6-11, былыта суох кэмигэр -13-18 кыраадыс тымныы. Хотугулуу-илин -23-28 кыраадыс тымныы».

Тустаах исписиэлиистэр этэллэринэн кэнники сылларга килиимэт уларыйааһына, олох тэтимэ түргэтиир, онон үөрэтии, чинчийии үлэтэ салҕанар.