Кыстык саҕаланна. Быйыл оттооһун үгүс улуустарга уустуктук ааста

Оттооһун хаар түһүөр диэри салҕанна итиэннэ бүтэһиктээх сыыппара таҕыста. Быйыл сайын барыта 411 тыһыынча туонна от бэлэмнэннэ.  Билигин  хаһаайыстыбалар сайылыктан толору хотоҥҥо көстүлэр. Онон сүөһүлэр  номнуо аһылыкка тураллар. Быйыл 202 тыһыынча төбө кыстыкка киирдэ. Бу ааспыт сылы кытта тэҥнээтэххэ   2.8 % аччаабыт. Тыа хаһаайыстыбатын министиэристибэтэ иһитиннэрэринэн кэккэ хотугу улуустарга уустук кыһын ааһара күүтүллэр.

Василий Бессонов, СӨ ТХМ сүөһүнү иитиигэ, племенной үлэҕэ, кэпэрээссийэҕэ уонна бааһынай хамсааһыныгар департаменын салайааччы: «Верхоянскай, Абый, Муома улуустарыгар кыстык хаардара олус эрдэ от күөх эрдэҕинэ түһэн ыарахан уустуктары үөскэтэн эрэр. Нэдиэлэ ахсын ыарахан кыстыктаах улуустары кытта мунньахтыыбыт. Кыстык аҥаарыгар дылы тиийэр хотугу улуустар оттоохтор, саҥа дьыл кэннэ туох үлэни, туох көмө оҥоруохтаахпытын быһаарсыахтаахпыт».

Ордук уустук балаһыанньалаах Өймөкөөн улууһугар суол сабыллыытын баттаһа 1100 туонна от тиэлиннэ. Билигин ыраах баар баазаларга сүүстэн тахса туонна тиийэрэ хаалан турар. Оччоҕо бэйэлэрэ оттообуттарын кытта кыстыгы ортолоһуохтаахтар.

Уопсайынан быйыл үгүс улууска от хаамыыта ыараханнык барда. Киин, Бүлүү бөлөх улуустарга кытта сирдэрэ ууга баран былаан туолбата.

Владимир Анисимов, Сунтаар улууһун тыа хаһаайыстыбатын салалтатын салайааччы: «Быйыл оппут ууга баран кыайан былааммытын толорботубут. Сиилэспит былаанын таһынан баран олоробут».

Ыанар ынах ахсаана 71 тыһыынчаттан тахса, оттон биэ ахсаана 21 тыһыынча кэриҥэ. Быйыл хороҕор муостаах төрүөҕэ этэҥҥэ, 53 тыһыынча кэриҥэ ньирэй төрөөн турар. Сыспай сиэллээҕи ылар эбит буоллахха, саҥа төрүөх ахсаана 77 тыһыынчаттан тахсаҕа тэҥнэстэ. Сыллата үгэс быһыытыынан, идэһэ кэннэ ынах-сүөһү, сылгы ахсаана аҕыйыыра күүтүллэр. Ол курдук быһа холоон хороҕор моустаах 160 тыһыынча курдук оттон сылгы 170 тыһыынча буолуо диэн сылыктыыллар