Бэтэрээн байыастарга саҥа массыына туттардылар

Сабыс-саҥа аныгы толору хааччыллыылаах массыналарыгар анал байыаннай дьайыы бэтэрээннэрэ олорон, тутан-хабан көрөллөр. Дмитрий Федотов убайын уонна ийэ кылын кытта бу үөрүүлээх түгэнин үллэстэр. Кини эмиэ тутатына тимир көлөтүгэр олорон айаннаан көрдө. Дьиэ кэргэн аҕа баһылыга бастатан туран дьоммун таһарбар улахан киэҥ-куоҥ массыына эбит диэн үөрбүт.

Дмитрий Федотов, анал байыаннай дьайыы бэтэрээнэ: "Оһуобай эбит, улахан баҕайы. Бу илиинэн салайыллар массыына. Гааһа, туормаһа илиинэн баттанар. Оҕолорбун оскуолаҕа таһыам. Аны кыһыҥҥы көлүөһэ эмиэ биэрдилэр".

Биир бастакынан бу анал таҥыллыбыт тимир көлөнү 4 бэтэрээн ылла. Тустаах массыыналар Калининград куоракка российскай собуокка таҥыллан оҥоһуллубуттар. Саха сиригэр аан маҥнайгытын аҕаллылар. Бу маннык тимир көлөлөрү анал байыаннай дьайыыга сылдьан атахтарын улаханнык эчэппит, доруобуйаларыгар хааччахтаах байыастарга биэрэллэр. Онон массыына илиинэн салайыллар.

Алексей Александров, "Защитники Отечества" Саха сиринээҕи пуонадатын салайааччы: "Итинник уолаттары биһиги барыларын учуоттуу сылдьабыт. Саамай сүрүнэ  диэн “СМ” категориялаах диэн саҥа суоппар быраабар үөрэниэхтэрин наада. Ким эрдэ суоппар бырааптаах түргэнник үөрэҕи ааһаллар. Икки нэдиэлэ курдук ыытарга холоноллор. Оттон эрдэ суоппар бырааба суох уолаттар толору үөрэниэхтэрин наада".

Маныаха тустаах тимир көлөнү ыытар быраабы ыларга үөрэммит байыастар төлөбүрдэрин төнүннэриэхтэрин сөп. Ол курдук, Ил Дархан ыйааҕынан туһааннаах "МС” категорияҕа үөрэммит анал байыаннай дьайыы кыттыылаахтарыгар төлөбүрдэрин толуйаллар. Байыас үөрэммит докумуоннарын, квитанциятын илдьэ Аҕа дойду көмүскээччилэрин пуондатын нөҥүө кэлэн хайдах төнүннэрэрин туоһулаһыан сөп.

Георгий Степанов,СӨ Бырабыыталыстыба бэрэссэдээтэлин солбуйааччы: "Маҥнайгынан үөрэҕи ааспыт 4 уолбутугар саҥа массыына туттардыбыт. Өрөспүүбүлүкэ былааһын биир сүрүн соругунан бэтэрээн байыастары социальнай, уопсастыбаннай олоххо тэтимнээх буолууларын ситиһии”.

Онон анал байыаннай дьайыы кыттыылаахтарыгар көмө араас миэрэтэ салҕанар. Оттон бу массыыналар бэтэрээннэргэ социальнай олоххо этэҥҥэ киирэллэригэр күүс-көмө буолуо диэн эрэл баар.