Аҕам саастаахтарга бэйэ дьыалатын арыйыыга үөрэх саҕаланна

Саҥаны айарга-тутарга, бэйэ дьыалатын арыйыыга харахтара уоттаах дьон манна түмсүбүт. 50 киһиттэн сүүмэрдэнэн 25 иккис үөрэхтээһин түһүмэҕэр кэлбиттэр. Барыта 5 араас улуустан уонна Дьокуускай куораттан мустубуттар. Хас биир кыттааччы бэйэ дьыалатын арыйыыга этиилээх. Холобур, Альбина Буркина аҕам саастаахтарга тас дойдуну көрдөрөр былааннаах.

Альбина Буркина, "Серебряный старт" бырайыак кыттыылааҕа: “Мин туризм эйгэтин ордук сэҥээрэбин. Бэйэм саастыылаахтарбын атын дойдуга илдьэ барыахпын баҕарабын. Бизнес бырыйыак диэни суруйары олох сатаабаппын , онно үөрэниэхпин баҕарабын”.  

Оттон  Василий Стручков Дьааҥы улууһуттан анаан-минээн бизнес ымпыгар-чымпыгар үөрэнэ кэлбит. Кини эдэр сылдьан сөбүлүүр дьарыгын сөргүтэр баҕалаах. Ол курдук уһуннук умайар оһох, оттуур тиэхиньикэ,  уустук сирдэринэн сылдьар чэпчэки ыйааһыннаах көлөрү оҥорор. Маны барытын кини хоту сир дьонун олоҕун чэпчэтиигэ анаан кыһаллар. 

Василий Стручков, "Серебряный старт" бырайыак кыттыылааҕа: “Оҥоро тиэхиньикэлэрэ бу сиргэ аналлаахтар. Холобур, от охсор тэриллэр көнө сиргэ анммыттар. Оттон биһиэхэ хоту сирбит бадарааннаах, дулҕалаах. Ол оннукка үлэлиир, барар-кэлэр туһаныллар тиэхиньикэ наада”.  

Бэйэ дьыалатын салайыы ымпыгын-чымпыгын баһылааһын үөрэҕэр  10 күн бэриллэр. Онон мүнүүтэни да куоттарбакка тута дьарыктар саҕаланаллар. Бастаан хамаандаҕа арахсан сорудахтары илдьиритэллэр. Полина Ноева бэйэтин саастыылаахтарын кэрэ эйгэтигэр уһуйар. Оттон бу бырайыактан хайдах сөпкө бэйэ дьыалатын салайыыга үөрэнэ кэлбит.

Полина Ноева, "Серебряный старт" бырайыак кыттыылааҕа: “Хас биирдии кэрэ аҥаар иһигэр санаалаах, онкутын оҕо төрөөн, үөрэнэн  олоххо киллэрбэт. Ону бу олус үчүгэй сааска кэлбиччэ дьэ арыый да налыйан, бэйэтигэр бириэмэ анаан дьарыктанарыгар мин көмө буолабын”.  

10 күн устата үөрэнэн баран түмүгэр бэйэлэрин бырайыактарын оҥорон таһаарыахтаахтар.

Зоя Седалищева, "Мой бизнес" киин генеральнай дириэктэрэ: “Экономика, үп өттүнэн сөпкө быһаарсыы, суот-учуот дьыалата, нолуок боппуруостарын үөрэтэллэр. Итиэннэ бэйэлэрин бырайыактарын араас өттүттэн көрөннөр, онтон көмүскээннэр салгыы грааҥҥа киирсэллэр”.  

Кыайыылаах 150 тыһыынча бириэмийэни тутар уонна салгыы федеральнай түһүмэххэ кыттар.