"Саха" ГТРК  бастакы дириэктэрин сырдык кэриэһигэр мэҥэ бэлиэ арылынна

Харлампий Назарович Дьяконов 16 сыл устата салайан кэлбит ГТРК "Саха" дьиэтигэр киниэхэ анаммыт мэҥэ таас аһыллыытын үөрүүлээх түгэнэ. Тэрээһиҥҥэ оччотооҕу хомсомуол саҕаттан бииргэ алтыһан, үлэлээн-хамнаан кэлбит дьоно, коллегалара муһуннулар. Харлампий Назарович 90-с сылларга  социальнай харалта миниистирин Александр Акимов солбуйааччытынан таһаарыылаахтык үлэлээбитэ.

Александр Акимов, Арктикаҕа СӨ баһылыгын анал бэрэстэбиитэлэ: "Министиэристибэҕэ олус үчүгэйдик бииргэ үлэлээн турабыт. Кини онно уонтан тахса сыл кэмитиэти тэрийэн, улуустарга араас кииннэри тэрийэн, исписэлиистэри бэлэмнээн нэһилиэнньэ араас араҥатыгар ыытан тураллар". 

Харлампий Дьяконов 2002 сыллахаха "Саха" көрдөрөр-иһитиннэрэр хампаанньа салайааччытынан анаммыта. Кини көҕүлээһининэн улуустарга телевидение 35 филиала тэриллибитэ, ФМ долгуҥҥа радио канала аһыллыбыта, олохтоох тв көстөр бириэмэтин 3 төгүл улаатыннарбыта.

Иннокентий Киренскай, "Саха" ГТРК радио сулууспатын салайааччы: "Харлампий Назарович учуонай быһыытынан, үрдүк толкуйдаах сатабыллаах салаайааччы быһыытынан элбэх саҥаны киллэрэн саха суруналыыстыката сайдарыгар улахан өҥөлөөх".

Ол курдук кини 2005 сыллаахтан ВГТРК филиалын олохтон туоруор диэри салайбыта. Бу кэм устата тэрилтэ дьоһун хардыыны оҥорон телевидение сүрүн бириэмийэтин ТЭФИ ылыыттан саҕалаан сыыппараҕа көһүөр диэри чыпчааллары ситиспитэ. Быйыл Харлампий Дьяконов төрүттэспит ГТРК "Саха" хампаанньа тэриллибитэ 20 сыла. 

Үбүлүөйдээх сылга хампаанньа "20 сыл бииргэ" диэн документальнай киинэ сүрэхтээтэ. Киинэҕэ тэрилтэ хайдах атаҕар туран, дойду үрдүнэн олохтоох сонуну нэһилиэнньэҕэ тарҕатар историята чаҕылхайдык ойууланар. 

Алена Шестакова, киинэ автора, "Саха" ГТРК сонуннарын салайааччытын солбуйааччы, шеф-редактор: "Бу киинэҕэ биһиги сайдыыбыт үктэллэрин көрдөрөбүт. Инникитин биһигини сайдыы күүтэр, манан тохтообоппут, иннибит диэкки баран иһэбит, салгыы сайдабыт, көрөөччүбүт туһугар үлэлиибит-хамныыбыт".

Күн ахсын "Вести-Саха" нууччалыы-сахалыы тыллаах сонуннара Россия-1 ханаалынан көстөллөр. Бу маны көрөөччүгэ тиэрдэр үлэһит дьон туһунан киинэҕэ сиһилии кэпсэнэр.

Руслана Максимова, "Саха" ГТРК сонуннарын сахалыы таһаарыытын шеф-редактора: "Өрөспүүбүлүкэ олохтоохторугар эрэ буолбакка бүтүн дойду үрдүнэн регион сайдыытын, былааннарын, олоҕун-дьаһаҕын кэпсиибит. Бу үлэбит киинэ буолан түмүллэн тахсыбыта олус үчүгэй. Саха суруналыыстыкатын сайдыытыгар дьоһуннаах улахан кылаат буолар диэн бэлиэтиибин ".

Билигин хампаанньаҕа биллэр суруналыыс Ирина Гоголева салайааччылаах 80 кэриҥэ киһилээх коллектив үлэлиир. Харлампий Дьяконов олук уурбут тэрилтэтэ салгыы үүнэр, сайдар.