Медицинскэй колледж устудьуоннара анал байыаннай дьайыы кыттыылаахтарыгар анаан аахсыйа ыыталлар

Бу курдук Дьокуускайдааҕы медицинскэй колледж устудьуоннара анал байыаннай дьайыы кыттыылаахтарыгар хомуйбут көмөлөрүн наардаан, дьаарыстаан уураллар. Алена Кузьмина бу аахсыйаҕа куруук кыттыһарын, төһө кыалларынан бэйэтин көмөтүн оҥорорун этэр.

Алёна Кузьмина, Дьокуускайдааҕы медицинскэй колледжын 2-с кууруһун устудьуона: "Бордуукта, суунар тэрил, таҥас-сап ылан ыытааччыбыт. Бөлөҕүнэн сиэккэ өрүүтүгэр көмөлөһөөччүбүт".

Маны таһынан устудьуоннар үөрэхтэрин кэннэ быыс булан хаххалыыр сиэккэ өрөллөр, сылаас наскы баайаллар итиэннэ сахалыы харысхал оҥороллор. Күн бүгүн үөрэх кыһатыгар 2 тыһыынчаттан тахса устудьуон үөрэнэр.

Анна Андреева, Дьокуускайдааҕы медицинскэй колледж иитэр үлэҕэ исписэлииһэ: "Дьокуускай куоракка уонна 15 оройуоҥҥа бааллар. Ол курдук 2025 сылга биһиэхэ Майаҕа уонна Үөһээ Бүлүүгэ арылынна. Кинилэр бу аахсыйаҕа эмиэ кытталлар. 4 дьааһык, 6 куул, ону таһынан 4 гааһынан үлэлиир плита уонна эмп ыытыллыбыта".

Үөрэх кыһата 2022 сылтан саҕалаан анал байыаннай дьайыы кыттыылаахтарыгар тиһигин быспакка көмөлөһөр. Таҥас-сап, ас-үөл, эмп уонна да атын наадалаах малы  хомуйан ыытар. Бу сыл саҕаланыаҕыттан үөрэх кыһата туоннаттан тахса  гуманитарнай көмөнү ыытта.

Туйаара Алексеева, Дьокуускайдааҕы медицинскэй колледж уопсайын сэбиэдэссэйин эбээһинэһин толорооччу: "Медициэнэҕэ үөрэнэр оҕолор байыаннай эбээһинэстээх буолаллар. Ол иһин бу аахсыйаҕа чугастык сыһыаннаһаллар уонна өйдөөн туран көмөлөһөллөр".

Бу курдук өрөспүүбүлүкэ тэрилтэлэрэ, салалтата, үөрэх кыһата, биирдиилээн да дьон анал байыаннай дьайыы кыттыылаахтарыгар көмө-өйөбүл буолаллар. Нэһилиэнньэҕэ куттал суох буолуутун хааччыйар уонна гражданскай көмүскэл министиэристибэтэ анал байыаннай дьайыы кыттыылаахтарын тиэхиньикэнэн, тырааныспарынан хааччыйарын салгыыр.

Айаал Вензель, СӨ нэһилиэнньэҕэ куттал суох буолуутун хааччыйар уонна гражданскай көмүскэлгэ миниистири бастакы солбуйааччы: "Пилота суох көтөр аалар саҥа көрүҥнэрэ ыытыга бэлэм буоллулар. Ону сэргэ гуманитарнай көмө уонна тиэхиньикэ хомулунна".

Аныгыскы нэдиэлэҕэ Саха сириттэн байыастарга анаан улахан гуманитарнай көмө айаннаары турар. Волонтердар икки туоннаттан тахса көмөнү хомуйан олороллор, маны таһынан тиэхиньикэ айанныаҕа.