Кикбоксиҥҥа Аан дойду Кубогын чемпиона Михаил Иванов пресс-конференция биэрдэ

Бу курдук чаҕылхай киирсиинэн Михаил Иванов эрэллээхтик биир тыынынан Аан дойду Кубогын ылар. Уонна Россия биир бастыҥ кикбоксера буоларын улахан рингэҕэ дакаастыыр. Биллэн турар үрдүк ситиһии, улахан үлэттэн тахсар. Дьаныардаах дьарык түмүгэр бу кыайыы кэлбитин Аан дойду кубогын хаһаайына үллэстэр.

Михаил Иванов, кикбоксиҥҥа Аан дойду Кубогын кыайыылааҕа, Россия спордун маастара: "Россияҕа бастакы хотуум кэннэ, 2021 сылтан наар дьарыктана сылдьабын, сынньаммыт нэдиэлэбин даҕаны өйдөөбөппүн. Ол иһин бэйэм дьарыкпар наар эрэллээхпин. Сүрүн дьарык бэйэбит дойдубутугар ааспыта. Эчэйиилэрдээхпин, онтуларым дьарыкка мэһэйдээбиттэрэ. Улахан спортка туох да чэпчэкитик ааспат, ааһыа да суохтаах дии саныыбын".

Михаил Иванов кик-боксиҥҥа Россия сүүмэрдэммит хамандатын хапытаана. Дойду бу көрүҥҥэ спортсменнарын кини кыайыыга салайар, кынаттыыр. Даҕатан эттэххэ, Михаил Иванов Россия 3 төгүллээх чемпиона,  Уһук Илиҥҥэ 7 төгүллээх кыайыылаах. Онтон быйыл бу муҥутуур кайыытын ситистэ. Аан дойду кубога Белорусь өрөспүүбүлүкэтигэр балаҕан ыйын бүтүүтэ ыытыллыбыта. Аан дойду бастыҥ кикбоксердара Минскэй куорат улахан түһүлгэтигэр кыайар иһин кииристилэр.

Михаил Иванов, кикбоксиҥҥа Аан дойду Кубогын кыайыылааҕа, Россия спордун маастара: "Быйылгы Аан дойду Кубогар үстэ киирсибитим. Утарсааччыларым бары араас дойдуттан сылдьаллар. Ол курдук Англия, Белорусь уонна Россия спортсменнарын кытта киирсибитим. Бары бэйэлэригэр эрэллээх дьоннор, бары мин хото кэллим диир дьоннор. Оттон мин эрэлим өссө улахан этэ, олох хотордуу барбытым".

Михаил Иванов идэтийбит спорду уонна оҕолору дьарыктааһыны тэҥҥэ дьүөрэлии тутар ураты спортсмен буолар. Маннык суоллаах-иистээх спортсмен дэҥҥэ көстөр. Тренер быһыытынан эмиэ үгүс ситиһиилэрдээх. Иитиллээччитэ Россия спордун маастарын нуорматын аҕыйах кэм иһигэр толорбута. Онон кини дойдуга кикбоксинг көрүҥэ сайдыытыгар инникитин өссө да күүскэ үлэлэһэр соруктаах.