Архитектордар нэдиэлэрэ салҕанар

Киин куоракка Саха сирин архитеордара түмсэн киэҥ программалаах тэрээһиннэргэ кытталлар. 5 күн устата исписэлиистэр бу хайысха баар суолталаах боппуруостары ырыталлар. Киин болҕомтону улуус кылаабынай архитектордарыгар анаммыт үөрэх семинар буолла. Тэрээһиҥҥэ сыл ахсын сокуон тиһилигэр киирэр уларыйыылары, саҥа ирдэбиллэри дьүүллэһэллэр. 

Вячеслав Егоров, Мэҥэ Хаҥалас улууһун тутуу салалтатыгар архитектура салаатын үлэһитэ: «Территорияны былааннааһын диэн сыалай хайысха.  Ол онно киирбит саҥардыылары хайдах олоххо киллэрэн туһаныахтаахпытын, ылыныахтаахпытын сиһилии ырытан биэрэр».  

Семинарга спикерынан Санкт-Петербург куораттан кэлбит Генплан институтун үлэһитэ, үөрэх кыһатын бэрэстэбиитэлэ Светлана Шишелова буолла.  Семинарга сүрүннээн 2024-25 сыларга баар бүтэһик уларыйыылары, генеральнай былааны таҥыы, бэлэмнээһин, тутааччылар сири туһаныыларын тула кэпсэтии таҕыста.

Евгений Семёнов, Покровскай куорат архитектора: «Дьиэ тас көстүүлэрэ, уопсастыбаннай сынньанар сирдэр куораттарга, нэһилиэктэргэ оҥоһуллаллара табыгастаах дии саныыбын».  

Архитектордар нэдиэлэлэрин тэҥэ, дьүөрэлии эдэр исписэлиискэ анаммыт киэҥ хабааннаах форум эмиэ тэриллэн ыытылла турар. Форум тутуу эйгэтигэр каадырдары бэлэмнээһин, оробуочай идэлэргэ болҕомтону уурууга ананна. Тэрээһиҥҥэ үөрэх кыһаларын устудьуоннара, улуустартан оскуола үөрэнээччилэрэ кэлэн кытыннылар. Кинилэр араас идэлэринэн маастар кылаастарга сырыттылар.

Саша Сидоров, Майатааҕы лицей 8 кылааһын үөрэнээччитэ: «Биһиэхэ барытын сиһилии кэпсээтилэр. Бырайыактааһын туһунан билистибит. Итиэннэ тугу эмэ бырайыактаан көрүҥ диэн сорудахтаатылар».

Хотугулуу-Илиҥҥи федеральнай университет архитектураҕа кафедрата архитектура уонна дизайн диэн маастар-кылаас көрдөрдө. Манна хас биирдии оҕо архитектура диэн тугун-ханныгын, идеятын өйдүүргэ холонно.

Ньургустаана Исматова, ХИФУ архитектураҕа кафедратын преподавателэ: «Уруккун кытта тэҥнээн көрдөххө архитектура идэтин билигин дьон бары билэр. Архитектордар, градостроителлар, дизайнердар диэн араараллар дьоннор. Биһиэхэ 5 курс үөрэнэр биирдии бөлөҕүнэн».

Эдэр исписэллистэр Форумнара уонна архитектордар нэдиэлэлэрэ бүгүн эмиэ кэккэ тэрээһиннэринэн саҕаныаҕа.