Үлэ Дьоруойа туруорсубут култуура киинэ үлэҕэ киирэн эрэр

Сунтаар улууһун тумус туттар киһитэ, Кириэстээх хаһаайыстыба тутаах үлэһитэ Владимир Африканович Михайлов үлэ үөһүгэр сылдьар. Киэһээҥҥи ыам бүтэн кыстыкка киириигэ хороҕор муостааҕы баайар быатын бэлэмниир. Быйыл өҥ сайын буолан өлгөм үүтү ыабыттарын, сүөһүлэр да туруктара этэҥҥэ уонна кыстыыр от булуллубут үөрүүтүн үллэстэр.

Владимир Михайлов, РФ Үлэ Дьоруойа: "Өрөмүөннэнэн бүтэн эрэбит. Бу сотору кэминэн киириэхпит. Быйыл ынахтарбытын сиэмэлээһин үчүгэй. 99% сиэмэлэттибит. Мин бэйэм 13 лиитэрэни ыыбын, оттон атыттарым 10 лиитэрэни ыыллар".

Владимир Африканович быйыл 73 хаарыгар үктэннэ. Аҕам саастаах үүтү ыаһыҥҥа кимиэхэ да иннин биэрбэт. Хаһаайыстыба үрдүнэн ордук элбэх кээмэйи кини ылар.

Владимир Михайлов сүөһүлэрин көрөрүнэн эрэ муҥурдаммат. Кини барыны бары сатыыр. Сайын устата сайылыгын бүтүннүү сибэккинэн киэргэтэр, оҕуруотун барытын эмиэ бэйэтэ олордор, көрөр. Маны тэҥэ сир астыыр, кыһыҥҥы хаһааһын булунар.

Владимир Михайлов, РФ Үлэ Дьоруойа: "Бу моонньоҕон уонна сугун барыанньата. Быйыл сир аһа үүммэтэ. Кэрийэммит буллум. Барыта отучча бааҥканы барыанньалаатым".

Үлэ Дьоруойа билигин санаата өрө көтөҕүллэн сылдьар. Сотору кэминэн олорор Кириэстээҕэр саҥа култуура дьиэтэ арыллаары турар. Санатан эттэххэ, Владимир Африканович Михайлов Үлэ Дьоруойа ааты ылан дойду президенигэр Владимир Путиҥҥа Кириэстээх нэһилиэгэр култуура дьиэтин туттарар туһунан баҕа санаатын эппитэ. Ол ыра санаата олоххо бу киирэн эрэр.

Владимир Михайлов, РФ Үлэ Дьоруойа: "Бэйэтин хонутуролунан тутан түмүктэнэн эрэр. Аны ураһа тутуллуохтаах, ол ситтэҕинэ өссө үчүгэй буолуо. Иккис туруорсуум хотон. Билигин бырайыага оҥоһулла сылдьар. Аны кһүҥҥүттэн тутан саҕалыахтаахтар".

Онон билигин Кириэстээхтэр аны саҥа хотон киирэрин кэтэһэллэр. Оччотугар дьэ Үлэ Дьоруойа Владимир Африканович өссө күүскэ үлэлиир, ыччаты уһуйар былааннаах. Тыа хаһаайыстыбатын салгыы сайыннарар сыаллаах.