Саха сирин бүттүүнүгэр тымныйыа

“Бу кустар Сайсары күөлүгэр уста сылдьар буолбатахтар, муус үрдүнэн хаама сылдьаллар. Халлаан улам тымныйан эрэр. Түүнүн -10 кыраадыска диэри кыраадыс түһүө”, - Татьяна Николаева.

Сайсары күөлгэ кус сыллата сөбүлээн түһэр сирэ. 80 саастаах Валентин Атласов күннэтэ күөл кытылынан дьаарбайар,таарычча кустары аһатар. 2 ый устата аһатан кэллим, бастаан отуччалар этэ, 3 дьиэ кэргэнинэн олорбуттара, онтон аҕыйаан сорохторо соҕуруу көттүлэр, аҕыйах хаалан бу сылдьаллар диэн кэпсиир.

Валентин Атласов, Дьокуускай олохтооҕо: "Күһүммүт арыый уһаата. Бастаан утаа хаардаан баран сылыйбыта. Инньэ гынан билигин тоҥордо. Аны төннүбэтэ буолуо". 

Алтынньы ый быыһык кэм, онон халлаан туруга уларыйа турар. Бү күннэргэ өрөспүүбүлүкэ үгүс улуустарыгар түүнүн хаардыаҕа, сорохторго күүстээх тыаллаах туруоҕа. Түүнүн тоҥорор, онон суол-иис халтараан. Киин улуустарга температура түүнүн -10 кыраадыска тиийэ тымныйар, күнүһүн биир, үс кыраадыс тымныы турар. Кэлэр күннэргэ үгүс улуустарга сүрүннээн кыра хаардаах, тыаллаах күн-дьыл турара сабаҕаланар. 

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: "Бу кэлэр күннэргэ кыралаан тымныйыа. Өрөспүүбүлүкэ үгүс оройуоннарыгар хаардыа. Уус Дьааҥы, Халыма, Индигир улуустарыгар хаардаах, тыаллаах күн-дьыл күүтүллэр". 

Оттон Дьокуускай-Аллараа Бэстээх хайысханан 10-ча паром сырыыта салҕанар. Бүгүҥҥүттэн алын суудуналар сырыылара бобуллар. Биир үксүн уопсай навигация сабыллыбытын кэннэ 3-4 паром хаалан буксир көмөтүнэн сыллата айаннааччы.Ону тэҥэ ирбистар сырыылара сотору саҕаланыаҕа. Онтон өрүскэ муус турбутун кэннэ ледокол көмөтүнэн ЛОРП тэрилтэ парома хаалан дьону, таһаҕаһы тиэйиэҕэ.

Кыһыҥҥы алтынньы ый үүнэн, күн-дьыл тымныы күүһүгэр сыыйа киирэн эрэр. Алтынньы норуот итэҕэлинэн Хотой Айыы ыйа. Бу ыйга сүрүннээн 5-20 миллимиэтиргэ тиийэ хаар түһэр, орто температура 5 кыраадыстан 15 диэри тымныйар. Куобах маҥхайар, 7 чыыһылаттан күн ат хаамыытынан кылгыыр диэн ааттыыллар. Алтынныьы 14 Бокуруоптан кыстыкка киирэбит.