Федор Охлопков турнирыгар саха уолаттара тэҥнээхтэрин булбатылар

Кыайыы өрөгөйө. Саха уолаттара турнир кыайыылаахтарынан буоллулар. Леонид Архангельскай уонна Михаил Ефимов күнүскү ытыыга 2000 миэтэрэ уһуннаах дистанцияҕа тэҥнээхтэри булбатылар, кыайыылааҕынан таҕыстылар.

Михаил Ефимов уонна Леонид Архангельскай, турнир кыайыылаахтара: «Бары бииргэ сүбэлэһэн, дьарыктанан, бииргэ үлэлээммит ситиһии кэллэ. Наар манна дьарыктанар буоламмыт, былааммытын толордубут».

Сэбиэскэй Сойуус Дьоруойа Федор Охлопков аатынан снайпердар турнирдара үһүс сылын ыытыллар. Уһук Илиҥҥэ президент боломуочуйалаах Юрий Трутнев күрэҕи үрдүк таһымнаахтык ааспытын диэн бэлиэтиир. "Сулус" полигон Россияҕа биир бастыҥ, үрдүк көрдөрүүлээх снайпердары бэлэмниир былаһаакканан буоларын этэр.

Юрий Трутнев, Уһук Илиҥҥэ Россия президенын боломуочуйалаах бэрэстэбиитэлэ: «Саха сиригэр, Ил Дархаҥҥа Айсен Сергеевич Николаевка махталбын тиэрдэбин. Бойобуой чаастартан байыастары бэрткэ хомуйбуккут. Бу силиһэ-мутуга Аҕа дойду Улуу сиэриититтэн саҕаланар, ол да иннинээҕи көҥүл олох иһин киирсиилэртэн».

Саха сирэ Россияҕа билигин даҕаны кыраҕы харахтаах снайпердарынан биллэр. Быйылгы да турнирга ону дакастаатылар. Кыттааччылар сылын аайы күүһүрэн, уопутуран, сэп-сэбиргэл тупсан, сайдан иһэр.

Александр Колесов, Россия Дьоруойа: «Манна уопут атастаһыы. Күрэхтэһээччилэр бэйэ бэйлэрин кытта билсэллэр. Араас ытар ньымалары көрөн үөрэнэллэр. Снайпернар маннык күрэххэ таһымнара үрдүүр».

Быйылгы турнирга хаһааҥҥытааҕар да элбэх киһи кыттыыны ылла. Уопсайа турнирга Россия регионнарыттан 120 кыттааччы икки күн устата күөн көрүстэ. Аҥаардас Саха сириттэн уопсайа 37 киһи кыттыыны ылла. Сергей Местников, : «Күммүт-дьылбыт арыый тыаллаах тымныы. Бу ытааччыларга өссө эбии мүчүмэҕэйдэри аҕалла. Кыттааччылар, ыалдьыттар бары үрдүк тэрээһиннээҕин бэлиэтииллэр. Ытарга усулуобуйа барыта тэриллэн турар. Биһиги Саха сиригэр тэриллибит полигон уонна күрэх сыллата таһыма үрдүүрүттэн үөрэбит».

Сылын аайы турнир таһыма үрдүүр, кыттааччыта элбии турар. Онон тэрийээччилэр аныгыскы буолар күрэхтэһиини норуоттар икки ардыларынааҕы таһымнаах ыытаары былаанныыллар.