Анал байыаннай дьайыы кыттыылаахтарын чөлүгэр түһэрии

Хас биирдии исписэлиис көмөтө манна күннээҕи олоххо төннүүгэ, бааһырыы кэннэ чөлүгэр түһүүгэ ананар. Манна 18 күн устата анал бырагыраамаанан эмтэниини барар. Байыастар кииҥҥэ психолог көмөтүн итиэннэ эт-сиин уоскуйуутугар, чэбдириитигэр массаж туһалааҕын бэлиэтииллэр.

анал байыаннай дьайыы кыттыылааҕа: "Сүрүн кыһалҕам сиспэр. Анараа сылдьан эчэйии бөҕө ылбыппын быһылаах".

Өрөспүүбүлүкэтээҕи чөлүгэр түһэрии киинигэр бу сылга  анал байыаннай дьайыы кыттыылаахтара уонна кинилэр дьиэ кэргэттэрэ уопсайа барыта 1 тыһыынча кэриҥэ киһи сытан эрэ көмөнү ыллылар. Манна киһи уйулҕатыгар, этигэр-сиинигэр улахан охсуу кэннэ оннугар түһэриигэ аналлаах бырагырааманан үлэ-хамнас ыытыллар. Уйулҕа үлэһиттэрэ бу кииҥҥэ анал үөрэҕи ааспыт исписэлиистэр.

Туйаара Токусарова, Өрөспүүбүлүкэтээҕи доруобуйаларынан хааччахтаах дьону чөлүгэр түһэрии киинин уйулҕа үлэһитэ: "Былырыын Ростовка госпитальга баран үлэлээбитим. Дьиҥнээх сэрии уйулҕатын, анараа миэстэтигэр баран билэн, тыынын үөрэтэн. Ол иһин мин кинилэри кытта үлэлэһэрбэр чэпчэки курдук. Уонна кинилэр кэргэттэрин, дьиэ кэргэттэрин кытта үлэлэһэбин". 

Кииҥҥэ байыастар уонна кинилэр дьиэ кэргэттэрэ социальнай харалта салалтатын нөҥүө уонна бэйэ баҕатынан киирэллэр. Манна кимиэхэ да аккаастаабаттар, барыларыгар көмөлөһөргө бэлэмэнэр. Уйулҕа, медициинэ көмөтүн сэргэ социальнай хайысхалаах өйөбүлү бу кииҥҥэ киирбиттэр эмиэ толору ылаллар. Ону тэҥэ араас хабааннаах көмө тэҥинэн барар.

Асида Алексеева, Өрөспүүбүлүкэтээҕи доруобуйаларынан хааччахтаах дьону чөлүгэр түһэрии киинин дириэктэрэ: "Биһиги кииммит байыаннай прокурору уонна Госфонду кытта мунньах ыытабыт. Онно анал байыаннай дьайыы кыттыылаахтара уонна кинилэр дьиэ кэргэттэрэ бэйэлэрин ыйытыыларын биэрэллэр. Ону тэҥэ суруктары суруйаллар. Ону биһиги байыаннай прокурорга тириэрдэбит. Туох баар бары боппуруостарын быһаара сатыыбыт". 

Дьокуускайга үлэлии турар кииннэр дьоҕус салаалара кэккэ улуустарга көмөнү оҥороллор.  Чөлүгэр түһэриини тэрийии билигин судаарыстыба биир сорун соруга. Ол иһигэр  уйулҕа үлэтин күүһүрдүү.

Дьулустаан Чичахов, СӨ Доруобуйа харыстабылын министиэристибэтин Нэһилиэнньэҕэ медицинскэй көмөнү оҥоруу департаменын салайааччы: "Ол курдук күн бүгүн 3993 буойун эмтэннэ. Балыыһаҕа 1174 анал байыаннай дьайыы кыттыылааҕа эмтэннэ. Чөлүгэр түһэриини 380 тахса киһи ааста. Ону таһынан уйулҕа үөрэхтээхтэрин көмөтүн 792 буойун туһанна".  

Ону тэҥэ Саха сирин быраастара Донецкай норуодунай өрөспүүбүлүкэҕэ улахан көмөнү оҥороллор. Ол курдук Докучаевскай куорат олохтоохторугар уонна байыаннай сулууспалаахтарга 1300 кэриҥэ эпэрээссийэни оҥордулар.