Социальнай ситимҥэ тарҕаммыт булчуттар миэрэҕэ тардыллыахтара

Сырдык уокка харахтара саатан, кыайан көппөт буолбут хаастары саастаах эр киһи тоҥ буорунан быраҕар. Ол эрэн ыксаан дуу, иҥсэтигэр дуу сыыһар. Онтон биир көтөрү моонньуттан тутан ылар. Маныаха сиэрэ суох булчут туһугар массыына иһиттэн дьахталлар ыалдьаллар.

Маннык ньыманан  киэһээҥҥи аһы булунуу сыаната олох атыннык тиэлийэн тахсыан сөп. Социальнай ситимҥэ тарҕаммыт видео билигин силиэстийэҕэ сылдьар.

Виталий Лаптев, СӨ айылҕа харыстабылын министиэристибэтин Булт департаменын  сүрүн исписэлииһэ: "Булт сокуонунан уотунан тыктаран бултааһын бобуллан турар. Хааһы тутааһынынан быраабы араҥаччылыыр уорганнарга матырыйаал барбыта. Дьарыктана сылдьаллар. Холуобунай дьыалаҕа тардыллыахтарын сөп. Эбэтэр бултуур бырааптарын быһыахтарын сөп". 

Уолуйбут хаастары сидьиҥник өлөрүүгэ кэрэ аҥаардар эмиэ кыттыһаллар, көҥүлэ суох бултарыттан үөрүү да көтүү. Хайаан да хаартыскаҕа түһэллэр. Маннык ньыманан Байанай бэлэҕин бултааһын устуулара манан бүппэт. Мотуордаах тыынан сылдьан хаастары эмиэ тыктаран тутаттаабыттара тарҕанар.

Оттон бу устууга туртастары эмиэ сырдык уотунан тыктаран, харахтарын саатырдан баран, мунан турдахтарына тэбэн элэк оҥостор. Устааччы күлэрин истэбит. Манна салгыы туох буолбутун сэрэйиллэр эрэ, - Мария Дмитриева, корреспондент.

Бу курдук суобаһа суох булчуттары үгүстэрин рейдэ кэмигэр туталлар. Итини сэргэ социальнай ситим эмиэ көмө буолар. Онон буруйдааҕы тутууга бары ньыма үлэлиир.

Семён Павлов, СӨ айылҕа харыстабылын министиэристибэтин Булт департаменын сүрүн исписэлииһин эбээһинэһин толорооччу: "3 кыбаартал түмүгүнэн 927 рейдэ буолла. Ол түмүгэр 8 холуобунай дьыала тэриллибитэ. Итини сэргэ 1578 административнай боротокуол толоруллунна".

Билигин туйахтааҕы бултааһын саҕаланна. Онон рейдэлэри ыытыы күүһүрдэ.