Дьокуускайдааҕы бырамыысыланнай техникум устудьуоннара саҥа мастарыскыайдарга үөрэнэллэр

Бу курдук сварщик идэтин баһылаары сылдьар устудьуоннары анал тэрилгэ үөрэтэллэр. Хаҥалас улууһуттан сылдьар Сайаан Иванов быйыл 1 кууруска киирдэ. "Кууруспутугар отуччабыт, үөрэхпитигэр саҥа мастарыскыай арыллан мантан тахсыбаппыт, барыта саҥа уонна интэриэһинэй", -  Т.Г. Десяткин аатынан Дьокуускайдааҕы бырамыысыланнай техникум 1-кы кууруһун устудьуона Сайаан Иванов

Дьокуускайдааҕы бырамыысыланнай техникумҥа быйыл иһэрдээччи  идэтин баһылыыр устудьуоннар үөрэнэр саҥа сыахтара. Мантан ыла  оҕолор элбэх ньыымаҕа үөрэниэхтэрэ,  дьоҕурдарын өссө чочуйуохтара.

Дьулустан Тимофеев, Т.Г. Десяткин аатынан Дьокуускайдааҕы бырамыысыланнай техникум уһуйааччыта: "Устудьуоннар харахтара умайа сылдьар, үөрэниэхтэрин эрэ баҕараллар. Бу иннинэ сэбиэскэй саҕанааҕы мастарыскыайга дьарыктанар этибит. Саҥа оборуудабанньа бөҕө кэллэ. Онон бу күнтэн саҕалаан устудьуоннарбытын эрчийэн саҕалаатыбыт".

Оһуор хас биирди чэрчигин ырылхайдык, ымпыгар-чымпыгар тиийэ ювелир идэтин баһылыыр устудьуоннар оҥороллор. Василина Десяткина ювелир идэтигэр үөрэммитэ үһүс сылыгар барда, анал оборуудабанньаҕа саҥа үөрэнэн эрэбин, улахан, туһанар хайысхата олус элбэҕин кэпсиир.

Василина Десяткина, Т.Г. Десяткин аатынан Дьокуускайдааҕы промышленность техникум 3-с кууруһун устудьуона: "Бу оборуудабанньанан көрөн кыра эттиктэри уруһуйдуурга үчүгэй. Чугастан көрөргө табыгастаах".

Бу үөрэх кыһата өрөспүүбүлүкэҕэ биир бастыҥ идэтийбит үлэһиттэри бэлэмнээн таһаарар. Күн бүгүн техникумна 500-тэн тахса оҕо үөрэнэр. Манна устудьуоннары 10 идэҕэ үөрэтэллэр.

Айаал Докторов, Т.Г. Десяткин аатынан Дьокуускайдааҕы бырамыысыланнай техникум дириэктэрэ: "Онтон атын биһиэхэ иһэрдии технологията, хонтуруоллуур-кээмэйдиир прибордар уонна электромонтаж диэн хайысхалар арылыннылар ".

Мантан ыла оҕолоро аныгы, туох баар усулуобуйаҕа эппиэттиир анал мастарыскыайдарга үөрэнэн сайдыахтара, билиилэрин хаҥатыахтара.  Өрөспүүбүлүкэ үрдүнэн күн бүгүн  17 үөрэх кыһатыгар уопсайа 48 мастарыскыай ситиһилээхтик үлэлии турар. Инникитин маннык анал хостору өссө элбэтэр, кэҥэтэр былаан баар.