Саҥардыллыбыт Дьиэ тутар кэмбинээт бастакы оҥоһуллан тахсыбыт панелларынан тутуу саҕаланна

Бу Дьокуускайдааҕы дьиэни туттар кэмбинээт оҥорон таһаарар саҥа панелларынан тутуллуохтаах дьиэ. Сыбаайа бу сайын түспүтэ. Бетону кутуу түмүктэммит. Билигин холлоҕоһу туорууга киирдилэр.

Баараҕай кыраан Саха сирин тутуутун историятыгар биэлиэ түгэни саҕалыыр. Бастакы панель өрө көтөҕүллэн тахсар. Итиэннэ туһааннаах сиригэр ууруллар. Маннык ньыма быдан түргэн, бэйэ бэйтигэр холбоон таҥан таһааран иһиллэр.

Павел Корнилов, тутуу прораба: «Кыра-кыралаан дьиэбитин саҕалаатыбыт. Саҥа дьылга дылы хоруопкабытын сабаары сылдьабыт. 8 этээстээх дьиэ хоруопкатын 2,5 ый курдугунан бүтэриэхтээхпит».

Тутуу болдьоҕун түргэтитии дьиэ тутар кэмбинээт саҥалыы үлэлээһинин биир сүрүн соруга. Мантан инньэ сылы эргиччи тохтоло суох үлэ барыахтаах, итини сэргэ инникитин сыана түһүүтүн ситиһиллиэхтээх диэн кэмбинээт арыллыытыгар этиллэн турар.

Бу саас арыллыбыт кэмбинээт тотолору күүһүгэр киирэн сайыҥҥыттан үлэлээн саҕалаабыта. Итиэннэ бу кэм иһигэр бастакы 8 мэндиэмэннээх дьиэ матырыйаалын оҥорон таһаарда.

Андрей Сторожев, "РИА - Строй" хампаанньа сүрүн технолога: «Тиэйэн саҕалаатыбыт, бастакы панель бүгүн таҥыыта барда. Былааммытыгар билигин иккис, үһүс дьиэ бырайыага баар, бэлэм. Ол дьиэлэр матырыйаалларын оҥорон саҕалаатыбыт. Онтон тэтимирэн номнуо билэн-көрөн бүтүннүү оҥоһуннубут, ол иһин салгыы түргэнник оҥорор былааннаахпыт».

Бу элбэх мэндиэмэннээх биир дьиэ матырыйаала кыстанан сытар. Оҥоһуллан тахсыбыт панеллар манна сааһыланаллар итиэннэ түһүмэҕинэн арахсан тиэллэллэр. Маннык тииптээх дьиэлэри быйыл "Звезднай" түөлбэҕэ тутааһын саҕаланна, оттон эһиил 17 кыбаарталы саҥардыыга туһаныахтара.