Мэҥэ Хаҥалас улууһун Сыымах нэһилиэгэр гаас кэллэ

Өрөспүүбүлүкэ аҕа баһылыга Айсен Николаев үөрүүлээх быһыыга күөх төлөнү уматта. Мэҥэ Хаҥалас улууһун Сыымах нэһилиэгин олохтоохторо гааска холбоннулар. Уопсайа 100-тэн тахса дьиэ күөх төлөн холбонно.

Артём Попов, "Сахатранснефтегаз" АУо үлэһитэ: «Уопсайа Сыымахха 115 дуогабар баттастыбыт уонна 115 газопровод таһаардыбыт уонна бу кыһын барытыгар газ ыытыыта буолуо».

Айсен Николаев олохтоохтор үөрүүлэрин үллэстэ элбэх оҕолоох Тарасовтар дьиэ кэргэҥҥэ ыалдьыттаата. Номнуо гаас оһоххо чэй оргуйар.

Тарасовтар дьиэ кэргэн бу түгэни күүппүттэрэ ыраатта. Мантан ыла дьиэбит сылаас уонна ичигэс буолуо диэн этэллэр. Николай уонна Сардаана түөрт оҕолоохтор, кырала алта саастаах. Дьиэлэрин үс сыллааҕыта туттан киирбиттэр. Гааһы кытта тэҥҥэ сынньалаҥ олох кэлэриттэн үөрүүлэрэ улахан.

Николай Тарасов, Сыымах нэһилиэгин олохтооҕо: «Күөх төлөн киирбитэ биһиэхэ бастатан, маһы кэрдэ барбаппыт, мантан ыраах баҕайы кэрдэбит. Билигин гааска кнопка баттаатын эрэ, кран арыйдыҥ эрэ умайан киирэн барар. Гаас киирбитэ үөрүүлээх, махтанабыт эрэ».

Өрөспүүбүлүкэҕэ күөх төлөн кириитэ тыа сиригэр олорор усулуобуйаны тупсарар, сайдыы суолун аҕалар. Саха сиригэр социальнай газификация бырагырамата 2021 сылтан ситиһилээхтик үлэлиир. Сыл саҕаланыаҕыттан күөх төлөннө 1300-тэн тахса дьиэ холбонно. 2030 сылга диэри 28 нэһилиэнньэлээх пууннарыгар күөх төлөн ситимигэр холбонуохтаах диэн былаан турар.

Айсен Николаев, СӨ Ил Дархана: «Билигин бу нэһилиэк иннигэр тыа хаһаайыстыбатын сайдыытыгар, атын хайысхалар баар буолаллар. Ол иһин биһиги өрөспүүбүлүкэбит төһө да ыарахаттар баар буолбуттарын иһин газификацияҕа урукку да сылларга үлэлээбитэ, билигин биһи Президеммыт өйөөн хаһааҥытааҕар да күүстээхтик үлэлии сылдьабыт».

Сыымах - Сахалартан бастакы Сэбиэскэй Сойуус Дьоруойа Федор Кузьмич Попов дойдута. Күөх төлөн субу күн киирбитэ  мээнэҕэ буолбатах. Алтынньы маҥнайгы күнүгэр 43 сыллаахха Федор Попов хорсун быһыыны оҥорбута. Глушец диэн дэриэбинэ аттыгар соҕотох Днепр өрүһү туораан өстөөхтөрү самнарбыта.

Бу бэлиэ күн Ил Дархан, Арассыыйа Дьоруойдара, уопсастыбыннас уонна олохтоохтор хорсун буойун паамытынньыгар сибэкки дьөрбөтүн уурдулар. Дьоруой дойдутугар аны эйэлээх, сынньалаҥ олоҕу мэктиэлиир төлөн умайда.