Саха Өрөспүүбүлүкэтигэр нацбырайыак чэрчитинэн 5 региональнай суолга өрөмүөн түмүктэннэ

40 миэтирэ усталаах саҥа бетон муоста Сунтаар улууһугар баар буолла. Улахан Харыйалаах үрэҕи туоруур күргэнэн номнуо сырыы олохтонон, массыналар быыстала суох айанныыллар. Бу Устье Кэмпэндээйи хайысхатыгар үһүс бүтэһик муоста буолар.

Юрий Афанасьев, Сунтаар улууһун тутуу салалтатын салайааччыта: «Былырыыҥҥыттан 3 муоста тутулунна. Бу суолунан улахан таһаҕас тиэйэр тырааныспар сылдьар. Сунтаар биир промышленнай нэһилиэгин суолунан хааччыйар буолар. Кэмпэндээйигэ туус, таас чох уонна цеолит хостонор».

Онон бу Сунтаар улууһун сайдыытыгар сүҥкэн суолталаах эбийиэк буолар. Маны тэҥэ бу сылга Өлүөхүмэ улууһугар Оччугуй Черепаниха үрэҕи туоруур 72 миэтирэ усталаах тимир күргэ тутуллан үлэҕэ киирдэ. Бу Умнас айан суолун 630 килэмиэтиригэр. Даҕатан эттэххэ, бу сылга тустаах суолга хас да учаастак өрөмүөннэннэ.

Ордук уһун учаастак Хаҥалас улууһугар, итиэннэ Өлүөхүмэҕэ буолар. Онон ити эҥэр суол-иис биллэ тубуста. Саҥа аспаал тэлгэнэн, сүрүн үлэлэр түмүктэннилэр. Билигин үлэһиттэр суол бэлиэлэрин, уоту-күөһү тардаллара хаалла.

Надежда Яковлева, СӨ массыына суолларын салалтатын хапытаалынай тутуу салаатын сүрүн инженерэ: «Улахан саҥардыы 4 балаһалаах Умнас суолга бара турар. 2027 сыллаахха туттарыахтаахпыт. “Инфраструктура для жизни” нацбырайыагынан балаҕан ыйын 2 декадатыгар Саха Өрөспүүбүлүкэтигэр улахан түмүктэр ситиһиилэннилэр. Бырайыак чэрчитинэн 5 региональнай суолга: Нам, Умнас, Өймөкөөн, Бөтүн уонна Харбалаах өрөмүөн түмүктэннэ. Ону тэҥэ Өлүөхүмэ уонна Сунтаар оройуоннарыгар саҥардыы кэнниттэн 3 муоста ситиһиилээхтик үлэҕэ киирдэ».

Намныыр суолга икки уһун учаастак өрөмүөннэннэ. Ол курдук, 34 килэмиэтиртэн 39 килэмиэтиргэ диэри уонна 133-тэн 153-кэ диэри. Манна биир эмиэ ордук кэтэһиилээх учаастагынан Кангалааска айанныыр  суол буолар. Билигин өрөмүөннэнэн киин куорат таһынааҕы трасса биллэ тубуста, саҥардылынна.

Өссө икки өрөмүөн үлэтэ тыа сиригэр, Мэҥэ Хаҥалас улууһугар ыытылынна. Ол курдук, манна Мүрү айан суолугар Майя уонна Бөкө сэлиэнньэлэригэр саҥа аспаал тэлгэннэ. Онон тыа сиригэр инфраструктура сайдыытыгар улахан хардыы буолла. Оттон сотору кэминэн Умнас  уонна Кэбээйи суолларыгар өрөмүөн үлэтэ түмүктэниэҕэ. Маны тэҥэ Өлүөхүмэҕэ өссө биир саҥа муоста үлэҕэ киириэҕэ.