Анал байыаннай дьайыыга сылдьар биир дойдулаахтарбытыгар көмөнү оҥоруу тохтообот

Бу Арктикатааҕы агротехнологическай университет устудьуоннара үөрэхтэрин кэннэ быыс булан маскировачнай сиэккэ өрөллөр. Сыл саҕаланыаҕыттан устудьуоннар 100-тэн тахса маннык сиэккэни өрөн ыыттылар.

Яков Горохов волонтердаабыта иккис сылыгар барда. Бу курдук устудьуоннар бары түмсэн, анал байыаннай дьайыы кыттыылаахтарыгар төһө кыалларбытынан бэйэбит көмөбүтүн оҥоробут, сэмэй кылааппытын киллэрэбит диэн этэр.

Яков Горохов, Арктикатааҕы Судаарыстыбаннай агротехнологическэй университет 2-с кууруһун устудьуона: «Байыаннай дьайыы кыттыылаахтарыгар биһи көмөлөһөрбүт сөп дии саныыбын. Кыайыы биһиэнэ буолуо диэн улахан эрэллээхпит».

Бу 2023 сыллаахха үөрэх иһинэн тэриллибит Патриот диэн киин. Күн бүгүн манна 30-ча устудьуон волонтер баар. Ону таһынан үөрэх кыһатын устудьуоннара ким да туора турбакка бары кэлэн көмөлөһөллөр.

Данил Горбунов, Арктикатааҕы Судаарыстыбаннай агротехнологическэй университет 3-с кууруһун устудьуона: «Ол кэмҥэ аҕыйах буолан саҕалаабыппыт. Билигин саҥа кэлбит оҕолор устудьуоннар, баҕа санаалаахтар кэлэн көмөлөһө тураллар. Билигин 26-тан тахса оҕо баар. Бу барыта үөрэх кэнниттэн буолар».

Маны таһынан АГАТУ устудьуоннара байыастарга ас астаан, бэлэмнээн ыыталлар. Ол курдук бурдук араас аһын, собо, кус-хаас, түргэнник буһарыллар бэлэм аһы бэлэмнээн ыыппттара үһүс сылыгар барда.  Бу сыллар устата барыта 3,5 туонна аһы ыыттылар.

Наталья Яковлева, АГАТУ иһинэн технология уонна салайыы колледжын дириэктэрэ: «Аспыт барыта өрөспүүбүлүкэ араас улуустарыттан кэлэр. Хоту дойдуттан балыктар, отон. Киин улуустартан убаһа, ынах этэ, балык».

Маны таһынан устудьуоннар анал байыаннай дьайыы кыттыылаахтарын дьиэ кэргэттэригэр, бэтэрээннэргэ баран куруук күүс-көмө буолаллар.