Хоту уонна Арктика улуустарыгар уунан таһаҕаһы тиэйии бүтэр түһүмэҕэр үктэннэ

Үгэскэ кубулуйубут күһүҥҥү хомуур кэнниттэн күрүгүөмнээх үлэ, норуокка биллэринии Пятак ыскалаатыгар бара турар. Анал хортуосканы таҥар оборудабанньаҕа үчүгэйэ, куһаҕана туспа-туспа баран, салгыы куулланнар. Билигин манна Тулагы хортуоската Хоту уонна Арктическай улуустарга бараары бэлэмнэнэр. Сотору кэминэн үөһээ халлаанынан гуруус айанныаҕа.

Галина Румянцева, ыскылаат сэбиэдиссэйэ: «Кыһыҥҥы хаһааспытыгар үлэлээн эрэбит. Сотору сөмөлүөттэрбит саҕаланыахтара, онтон ахсынньы ый бүппүтүн кэннэ кыһыҥҥы массыыналарбыт саҕаланыахтара, онно бэлэмнэнэн хаһаанабыт».

Күн бүгүн арктическай өрүстэринэн таһаҕаһы тиэйии түмүктүүр түһүмэҕэр чугаһаан эрэр. Уопсайа Абый, Аллайыаха, Үөһээ, Орто, Аллараа Халыма, Усуйаана, Дьааҥы, Булун уонна Эдьигээн улуустарыгар 414 туонна хаппыыста, хортуоска, моркуоп, сүбүөкүлэ уонна эриэппэ луук ыытыллынна. Онтон билигин суол турдаҕына ыыттыллар гуруус бэлэмнэнэр.

Эмиэ үчүгэйин, куһаҕанын талан, хаппыыстаны таҥыы үлэтэ күргүөмнээҕэ барар. Манна барыта илии улэтэ. Манна даҕатан эттэххэ, Арктическай атыы-эргиэн уонна логистика хампаанньата быйылгы уунан ыытар таһаҕастарын барытын ыытта.

Анна Григорьева, «Арктикатааҕы атыы-логистика хампаанньата» тэрилтэ атыыга-эргиэҥҥэ генеральнай дириэктэрин солбуйааччы: «Быйыл навигациябыт 1500 туоннаттан тахсаны иттибит. Бу өрөбүлгэ Белай Гораҕа оҕуруот аһа тиийэн, дьоннор үөрүүлэрэ үгүс. Онно быйыл уубут аҕыйах буолан бастаан тиэрдибэт кутталлаах этибит, ону бу бэҕэһээ оруобуна тиийэн дьоннор үөрдүлэр аҕай».

Быйыл уопсайа Арктическай навигациянан 1 мөл. 148 тыһынча туонна гуруус тиэйиллэн ыытылла турар. Онтон киһи олоҕор-дьаһаҕар 514 тыһ туонна таһаҕас уонна хаһаайыстыбаҕа анаммыт гуруус 439 тыһ тахса туонна барда.

Никита Павлов, СӨ гражданскай оборона уонна нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы: «Тиэрдиллиэхтээх сиргэ бүгүн уопсайа 953400 туонна тириэрдилиннэ, ол курдук былаантан 83% толордубут. Быйыл Арктика навигациятыгар былааммыт 326400 туонна курдук буолар».

Билигин таһаҕаһы тиэйии  былаана 89 быраһыана туолла. Аны хаалбыты толорор улэ ыытыллар.