Саха сиригэр тумуу уонна кириип ыарыытын көрдөрүүтэ үрдүүр

Уларыйа турар күнү-дьылы кытта вирустаах ыарыылар көбөллөр. Билигин халлааммыт ардыыр-хаардыыр, онтон эмискэ сылыйар тыалырар-кууһурар кэмэ. Бу кэмҥэ тумуу, кириип ыарыыларын көрдөрүүтэ биллэ үрдүүр. Онон балыыһаларга дьон сылдьыыта күһүҥҥү кэмҥэ буоларын курдук элбэх. Ол курдук орто көрдөрүүнү куоһарыы бэлиэтэнэр.

Туяра Герасимова, Роспотребнадзор Саха сиринээҕи салалтатын эпидемиологическай кэтээн көрүү салаатын исписэлииһэ: «Өрөспүүбүлүкэҕэ күн ахсын тумуу ыарыытын уонна кирииби кэтээн көрүү салҕанан бара турар. Билиҥҥи туругунан элбэх сыллааҕы кэтээн көрүү түмүгүнэн оҥоһуллубут нэдиэлэтээҕи орто көрдөрүүнү 24% куоһаран турар. Чуолаан 3-14 саастаахтар ыалдьаллар. Лабараторнай кэтээн көрүү түмүгүнэн кирииби тарҕатар вирустар биирдиилээн бааллар. ОРВИ тарҕатар вирустар бааллара бэлиэтэнэр».

Үлэ, үөрэх кэмэ буолан ордук оскуола уһуйаан саастаах оҕолор ыалдьаллар. Онон туһааннаах тэрилтэлэр өттүлэриттэн күннэтэ кэтээн көрүү барар. Ыарыы  тарҕаныытын тохтотууга харантыын биир көдьүүстээх миэрэ. Хааччах оҕо ахсааныттан 20 бырыһыана ыарыйдаҕына туһаныллар.

Исписэлиистэр бэлиэтииллэринэн, ОРВИ, кириип ыарыыттан харыстаныыга саамай көдьүүстээҕинэн быһыы  буолар. Бу ый саҥатыттан дойду үрдүнэн вакцина хампаанньата бара турар. Быһыыны олорор сиргинэн балыыһаҕа ыалыахха сөп, эбэтэр кэлэктииптэр сайаапканан үлэлиир сирдэригэр ыҥыраллар. Саха сиригэр күн бүгүн 170 тыһыынча кэриҥэ киһи ылла. Оттон былаан нэһилинньэ 60 бырыһыанын хабыы. Быйыл 3 көрүҥ быһыы өрөспүүбүлүкэҕэ кэллэ. 

Саргылаана Егорова, Дьокуускайдааҕы 3№-дээх балыыһа быһыы туруорар кабинетын медсиэстэрэтэ: «Биһиэхэ быйыл Совигрипп диэн уонна саҥа Флю-М диэн кэлбитэ. Эккиэн трехвалентнайдар. Флю-М Совигрипп курдук састааптаах».

Быһыы ылыытыгар биир бастакынан 60 -нарыттан үөһэ саастаахтар уонна оҕолор ыҥырыллаллар. Маны сэргэ тымыр-сүрэх, тыынар уорган ыарыылаахтар. Медициинэ, үөрэх, атыы-эргиэн эйгэтин үлэһиттэригэр болҕомто улахан.  Быһыыы кэннэ  икки нэдиэлэнэн ыарыыга ылларбат кыах күүһүрэр. Ол иһин быраастар гириип кэмин иннинэ ылары сүбэлииллэр. Ол эбэтэр билигин саамай тоҕоостоох кэм турарын ыйаллар.