Саха сиригэр кыстыкка киириигэ бэлэмнэнии бара турар

Бу курдук былыргылыы ньыманан Павловтар дьиэ кэргэн хотоннорун кыстыкка бэлэмнииллэр. Хороҕор муостаахтар бэйэлэрин ноһуомнарын сыбаан, хата кыһынын кимнээҕэр ичигэс буолар диэн ыал далбар хотуна Анита Ивановна кэпсиир. Кинилэр бу ньыманан сыллата халлаан тымныйыыта тутталлар.

Анита Павлова, Тулагы-Киллэм олохтооҕо: «Биһи уруккуттан былыргылыы сыбыыбыт. 3 хос сыбыыбын, оччоҕуна кыстыкка бэлэм буолар. Эдэр сылдьан билбэккэбин халыҥ баҕайы гына сыбаабытым, эмискэ ириэрии буолбутугар суллан түспүтэ. Онтон ыла мунньан баран хаста да сыбыыбын».

Павловтар дьиэ кэргэн Тулагы-Кииллэм нэһилиэгэр биир тарбахха баттанар кэтэх хаһаайыстыбалаах ыал буолаллар. Куорат таһынааҕы нэһилиэккэ үгүс киһи сүөһүтүн эһэн, хотон туппат эбит буоллахтарына, кинилэр хороҕор муостаахтарын оҕолуу көрөллөр. Хаһаайыстыба хотуна аҕыйах сыллааҕыта саха ынаҕын боруодатын ылан иитэр. Сиэннэрбэр иҥэмтэлээх үүт иһэрдэр соруктаах диэн эбээ киһи кэпсиир.

Оттон манна даҕатан эттэххэ, билигин тустаах нэһилиэккэ 985 хороҕор муостаах баар, онтон ыанара 500-тэн тасха. Сыспай сиэллээх  1300, онтон 800-һэ биэ. 17 тэриллиилээх хаһаайыстыба баар. Кинилэр бары кыстыкка киирэргэ бэлэмнэр.

Егор Попов, "Тулагы-Киллэм нэһилиэгэ" МТ баһылыга: «Кыстыкка бэлэмнэнии куһаҕана суох дии саныыбын. Дьоннор отторун тиэйдилэр, арыыга оттообут дьоннор кыһын суол турдаҕына таһаарыахтара».

Оттон билигин Өрөспүүбүлүкэ үрдунэн тэрээһиннээх да, кэтэх да хаһаайстыбалар кыстыкка киирэрэгэ бэлэмнэнии үөһүгэр сылдьаллар. Маныаха күн бүгүн үүт туттараһынын хампаанньатын бүтэһик күннэрэ. Былаан 86 быраһыан туолла. Былырыын баччаларга 48 тыһ. туонна үүт соҕотуопкаламмыт эбит буоллаҕына, быйыл 54 тыһ. туонна үрүн илгэ туттарыллан үүккэ хаамыы үчүгэй диэн тыа хаһаайыстыбатын министиэристибэтэ иһитиннэрэр.