Быйыл оҕуруот аһыгар өҥ дьыл

Быйыл оҕуруот аһыгар өҥ дьыл. Уп-улахан моркуоптар бааһынаны биир гына түөрүллэ сыталлар. Валерий Ким  оҕуруот аһын үүннэриигэ улахан уопуттаах, ол иһин үүнүүлээх дьылы мүччү туппакка быйыл үрдүк көрдөрүүнү ситиспит. Бу саас барыта 2 гектар иэннээх сиргэ моркуоп олордубут. Билигин дьэ ситэн хомуур тэтимнээхтик барар.

Валерий Ким - "Ким" бааһынай хаһаайыстыба салайааччыта: "Быйыл моркуоп үүнүүтэ олох үчүгэй. Көрүҥ, бөдөҥ да бөдөҥ гына үүммүттэр".

Марха быйаҥнаах сиригэр үүммүт оҕуруот аһа оҕо аһылыгар барар. Ол эбэтэр оскуолаларга, уһуйааннарга тарҕанар.  Валерий Ким бааһынай хаһаайыстыбата бу дьыаланан дьарыктаммыта 30 тахса сыл буолла. Онон кини ыһар хортуоппуйугар, моркуобугар хас да көлүөнэ ыччат улаатар.

"Быйыл морукуоп үүтүүнэ кырдьык олох үчүгэй. Холобур, 2 гектардаах сиртэн 30 туоннаны хомуйары былаанныыллар. Саха сирин кылгас сайыныгар өҕҥ дьылга бу курдук өлгөм үүнүүнү ылыахха сөп эбит", -Мария Дмитриева, корреспондент.

Моркуоп илиинэн эрэ хомуллар. Хас биирдии угу туура тардан, отун арааран хомуллар. Онон хомуурга элбэх киһи ирдэнэр. Дьокуускайдааҕы промышленнай техникум устудьуоннара бу хаһаайыстыбаны кытта үлэлэспиттэрэ хаһыс да сыла. 

Роман Николаев - Дьокуускайдааҕы промышленность техникумун устудьуона: "Хас сыл аайы маннык хортуоска, моркуоп хостооһунугар көмөлөһөбүт. Итиэннэ техникуммутугар көмөлөһөбүт, бу оҕруот аһын кыһын бэйэбит сиибит. Манна алдьархай үүнэр, сыл аайы үүнэр".

Устудьуоннар хомуйбут кээмэйдэриттэн 5% техникумҥа ылаллар. Онон үөрэх дьылын устата остолобуойдарыгар босхо аһыыллар. Оттон быйыл үүнүү үчүгэй буолан хайа да сыллааҕар элбэҕи аахсыахтара.

Валерий Ким,  "Ким" бааһынай хаһаайыстыба салайааччыта: "Тымныы кураан сайыны сылыктаабыттара ардахтаах буолла. Онон үүнүү үчүгэй буолла. Ааспыт сылы кытта тэҥнээтэххэ икки төгүл элбэх".

Үүнүү быйыл ханна баҕар  үчүгэй.  Ол аата битэмииннээх олохтоох оҕуруот аһа бу кыһын дэлэй буолар. 

Дьулустаан Харлампьев, СӨ ТХМ сири кытта үлэ уонна мелиорация департаменын салайааччытын солбуйааччы: "Урукку сыллары кытта тэҥнээн көрөр буоллахха үрдүк көрдөрүү. Ол курдук быйыл оҕуруот аһыгар 1 гектартан 127 сэнтиниэр үүнүүнү хомуйан олоробут".

Хомуур үлэтэ бары хаһаайыстыбаларга үмүрүйэн эрэр. Кэлэр нэдиэлэнэн түмүктэниэ, оҕуруоччуттар аны үүнүүнү батарыы, кэлэр сыл бэлэмигэр түөһүөхтэрэ.