"Ас-үөл-2025" дьаарбаҥка түөрт күн устата үлэлиэ

Саха сирин оҥорон таһаарыытын сүөгэйэ-сүмэтэ барыта биир сиргэ. Сибиэһэй эт-үүт, оҕуруот аһа хотойорунан тэлгэннэ. Ас-үөл дьаарбаҥката хаһаайыстыбаларга бородууксуйаларын киэҥ араҥаҕа таһаарар, сыанабылы ылар тутаах тэрээһин. Онон манна сыллата таһым үрдүүр, оҥорон таһаарыы кэҥиир. 

Людмила Протодьяконова, "Мүрү Ас" хаһаайыстыба үлэһитэ: "Биһиги атыыга үрүҥ ас арааһыттан аҕаллыбыт. Арыы баар, киилэтэ 1300 солк.". 

Дьон ордук ынах арыытын, эти, сыыры хамаҕатык атыылаһар. Холобур, сыана киилэ эккэ 1000 солк. саҕаланар. Ириэнэх сылдьар сибиэһэй эт эгэлгэтэ, сүөһү үрүҥ иһэ эмиэ хамаҕатык атыыга турбут. Итини сэргэ Саха сирин олохтоохторун мааны аһа - убаһа этэ кытта баар. Сыана 1500  тыһыынча солк.

Наталья Захарова, атыыһыт: "Амма Өнньүөһүттэн бородууксуйа кэллэ. Ынах этин 1200 солк. биэрэ турабыт. Утары бүтэ турар, бу билигин паром кэтэһэбит".

Быыстапка Саха сирин агропромышеннай комплексын сайдыытыгар улахан суолталаах. Бу салаа үлэтин түмүгүн нэһилиэнньэҕэ көрдөрөр тэрээһиннэртэн биирдэстэрэ. Манна хаһаайыстыбалар ырыынагы үөрэтэн-билэн, атын оҥорон таһаарааччылары билсэн уопут атастаһаллар. 

Артем Александров, СӨ тыа хаһаайыстыбатын миниистирэ: "Күрэхтэр булуохтара. Дьүүллүүр хамыыһыйа бигэргэнэн турар. Манна бородууксуйа хаачыстыбатын, тас көстүүтүн, маркетины сөптөөхтүк туһаныыны барытын көрөллөр.Түмүктүүр күҥҥэ кыайыылааҕы наҕараадалааһын буолуоҕа". 

Быыстапкаҕа тыа хаһаайыстыбатын бары хайысхата кыттыыны ылар. Кэнники сылларга тэтимнээхтик сайдар түргэнник ситэр салаа эмиэ атыыга баһаам бородууксуйаны таһаарда. Мэҥэ Хаҥалас Нуораҕанатын көтөрү иитэр хаһаайыстыбатын оҥорон таһаарыытын дьон хамаҕатык ылар. Эдэр фермер уопсайа 2 тыһ төбөлөөх.

Егор Иванов, хаһаайыстыба салайааччыта: "Үс сыллааҕыта граан кыайаммыт пиэрмэ арыйбыппыт. Манна эппитин аҕалан алыылыы сылдьабыт. Кууруссаттан араас тоҥ бородууксуйаны уонна ыыһаммыты аҕаллыбыт".

Хомуур үлэтэ түмүктэнэн, оҕуруот аһын эгэлгэтэ. Билигин саамай дэлэйэн турар кэмэ буолан, сыана удамыр. Онон кыһыҥҥыга хаһаанан кууһунан ылааччы үгүс. Оттон Кэбээйи бөдөҥ соботугар буоларын курдук уочарат халыҥ.

Наталья Иннокетьева, атыыһыт: "Дьон олус сэҥҥэрэнллэр, хамаҕатык ылаллар. Куруутун ылар дьоннордоохпут. Балыкпыт олох сип-сибиэһэй хамсыы сылдьар".  

Быйыл инники сыллардааҕар дьаарбаҥкаҕа кыттааччы ахсаана аҕыйах. Маны киин куоракка хас да сиринэн тэҥҥэ олохтоох ас дьаарбаҥката турарын этэллэр.

"Быйылгы быыстапка-дьаарбаҥкаҕа уопсайа 40-ча олохтоох оҥорон таһаарааччы бэйтин бордууксуйатын атыыга аҕалла. Онон бу инники түөрт күҥҥэ куорат олохтоохторо бэйэ аһын ылар кыахтаннылар", - Мария Дмитриева, корреспондент.

Оттон өрөбүл күн бастыҥ бородууксуйалаах хаһаайыстыбаны быһаарыахтара.