Айсен Николаевы кытта “Быһа линияҕа” олохтоохтортон ыйытыы тэтимнээхтик киирэр

Ил Дархан Айсен Николаевы кытта "Быһа линияҕа" бэлэмнэнии үлэтэ барар турар. Ол курдук тустаах киин оператордара Саха сирин олохтоохторуттан ыйытыылары тохтоло суох ыла олороллор. Күн бүгүн 600-тэн тахса ыйытыы киирдэ. Ордук олохтоохтору хаарбах дьиэттэн көһөрүү, элбэх оҕолооох дьиэ кэргэҥҥэ уонна анал байыаннай дьайыы кыттыылаахтарыгар көмө, суол-иис, саҥа тутуулар уонна да атын социальнай суолталаах боппуруостар киирэллэр.

Василий Десяткин, региону салайар киин салайааччыта: "Элбэх нэһилиэнньэлээх  улуустартан, куораттартан ордук элбэх ыйытыы киирэр. Биллэн турар, Дьокуускай куорат, Нерюнгри, Алдан, Өймөкөөн улуустара  итиэннэ хотуттан Абый, Орто Халыма улуустара".

Санатан эттэххэ, Айсен Николаевы кытта "Быһа линия" 2018 сылтан ыытыллар. Бу кэм устата Ил Дархан хоруйдаабыт сорудахтара быһаччы олоххо киирэллэр.

Бу 2023 сыллаахха үлэҕэ киирбит тыллара мөлтөх оҕолор оскуолара. Үөрэх тэрилтэтин тутуутун  Айсен Николаев 2019 сыллаахха быһа биэриигэ сорудухтаабыта. Баара-суоҕа 3 сыл иһигэр  күүстээх үлэ ыытыллан саҥа оскуола үлэҕэ киирбитэ. 

Саалаҕа өрөспүүбүлүкэ бастыҥ үөрэнээччилэрэ түмсэн олороллор. Бу эмиэ быһа биэрии кэмигэр этиллибит санаа олоххо киириитин түмүгэ. 2023 сыллаахха Бүтүн Арассыыйатаҕы олимпиадаларга ситиһилээхтик кыттыбыт үөрэнээччилэргэ бириэмийэ көрүллүө этэ диэн этии киирбитэ. Тута ол сыл  Ил Дархан ыйааҕа тахсыбыта, кыайыылаахтарга харчынан бириэмийэ олохтоммута.  

Ил Дархаҥҥа ыйытыылары икки көрүҥүнэн биэриэххэ сөп. Ол курдук телеграмм канал чат-ботугар эмиэ элбэх ыйытыы киирэр.  Күҥҥэ биир операторга 40-тан тахса ыйытыы тиксэр.

Мирослава Алексеева, оператор: "Сүрүннээн Өлүөнэни туоруур муоста тутуутун туһунан, нэһилиэнньэни гаастааһын, хаарбах туруктаах дьиэлэртэн көһөрүү курдук ыйытыылар элбэхтэр".

"Быһа лиинияҕа" Саха сирин олохтоохторуттан ыйытыылары балаҕан ыйын 18 күнүттэн ылан саҕалаабыттара. Ааспыкка 1,5 тыһ.тахса ыйытыы киирбит буоллаҕына, бу сырыыга өссө элбэх ыйытыы киирэрэ сабаҕаланар.

"Үгэскэ кубулуйбут "Быһа биэрии" Саха өрөспүүбүлүкэтин Судаарыстыбаннаһын күнүгэр, балаҕан ыйын 27 -гэр , киэһэ 7 чаастан саҕаланыаҕа. Тэлэбиидэнньэ, араадьыйа уонна социальнай  ситимнэр нөҥүө көрүөххэ сеп"., Ирина Гольдерова, корреспондент.