Аатырбыт Элгээйи бэчиэнньэтин астыыр “Астык” бэкээринэҕэ

Бастакы сип-сибиэһэй килиэптэр оһохтон буһан-хатан тахсаллар. Биэкэр Евдокия Яковлева бүтүн нэһилиэги хааччыйар кээмэйи астыыр. Күҥҥэ бииртэн үс эргииргэ тиийэ буһарар. Килиэп дьоҥҥо барытыгар тиксэрин курдук үлэтин күнэ хара сарсыардаттан саҕаланар.

Евдокия Яковлева, килиэп астааччы: "7 чаас иннинэ кэлэбит. Убуубутун сылытабыт, дьэ онтон тиэстэбин мэһийэбин".

Тустаах бэкээринэҕэ килиэптэн саҕалаан бурдук аһын арааһын астыыллар. Маныаха барыта урукку сэбиэскэй ырысыабынан оҥоһуллар. Онон  оччотооҕу кэми киһи хас биирдии бурдук аһыгар  амсайан оҕо сааһыгар төннүбүккэ диэри буолар. Оттон ордук биллэр минньигэс ас манна  бэчиэнньэ - норуокка Элгээйи бэчиэнньэтэ.

"Аатырбыт Элгээйи бэчиэнньэт оһохтон буһан тахсан эрэр. Амсайан көрөбүт. Олус минньигэс. Күҥҥэ бу курдук 180 киилэ бэчэнньэ буһан тахсар", -Ирена Осипова, корреспондент.

Ааттыын да "Астык" бэкээринэ үлэлээбитэ номнуо 10 сыла. Үс сыахтаах - эт аһы оҥорор, минньигэһи астыыр уонна бурдук аһын оҥорор. Үлэһиттэр үксүлэрэ бэкээринэ хара арыллыаҕыттан үлэлииллэр. Бары көрүҥ аһы астыыллар.

Ангелина Фёдорова, асчыт: "Саҥаттан саҥа бородууксуйаны таһаара сатыыбыт. Билигин үксүн бэчиэнньэннэн киирсэбит".

Оттон бу крем оҥорор салаа диэн бэйэтэ туспа. Анал температуралаах сөрүүн хос. Манна араас моһуоннаах, үксүн сибэккинэн киэргэммит бисквит тортары оҥороллор. Кондитер барытын эмиэ бэйэ илиитинэн оҥорон таһаарар. Бисквиттэр  сиир арыыттан оҥоһуллубут креминэн киэргэтиллэллэр. Даҕатан эттэххэ, сыахха улахан аҥаара  барыта бэйэ олохтоох аһа. Ол курдук, эдэр урбаанньыт бу бэкээринэ хаһаайката Туйаара Иванова барыта бэйэ аһын туһанар. Үтүө үгэһи салҕааччы буолар.

Туйаара Иванова, урбаанньыт: "Бэйэбит пиэрмэ тутуннубут. Ол иһин эппит, үүппүт, сүөгэйбит барыта бэйэбит киэнэ буолар ".

Астык бэкээринэ кондитерскай билигин номнуо өрөспүүбүлүкэ улахан аҥаарын бурдук,эт аһынан хааччыйар таһымҥа таҕыста. Ордук биллэр Элгээйи бэчиэнньэтин билигин оннооҕор хоту улуустар кытта сакаастаан ылан амсайар кыахтаннылар. Онон Элгээйи нэһилиэгин бэйэ олохтоох оҥорон таһаарар бурдук аһын бородууксуйата бэйэтэ туспа бренд буола улаатта.