Тыа сиригэр биир соҕотох бассейн

Сылы төгүрүччү ыраас-сылаас ууга күөлэһийии, доруобуйаны чэбдигирдии. Сунтаар нэһилигэр, тыа сиригэр бастакы бассейн арыллан дьон күннэтэ кэлэн сөтүөлүүр, этин-сиинин эрчийэр. 2 тыһ. тахса квадрат иэннээх эбийиэккэ бассейны таһынан дьарыктанар саала эмиэ баар. 4 этээстээх, аныгы ирдэбилгэ толору эппиэттиир тупсаҕай көстүүлээх спорт киинигэр олохтоохтор спордунан дьарыктаналларыгар бары усулуобуйа олохтоммут.

Владимир Данилов, "Байҕал" спорт комплекс дириэктэрэ: “Биһиги оскуолабыт оҕолоро физкультура уруогун оннугар сөтүөлүүллэр. Доруобуйа тупсарыытын туһугар. Оттон киэһэ өттүгэр нэһилиэнньэ кэлэн сөтүөлүүр. Ону таһынан ыаллыы сытар нэһилиэктэр оҕолоро эмиэ физкультуралыы кэлиэхтэрэ”.

Онон тустаах эбийиэк бүттүүн улууһу хабар кыахтаах. Бассейн 6 харбыыр суоллаах. Улахан куораттарга баар сөтүөлүүр комплекстар курдук бары туһааннаах бэлиэлэринэн, тэриллэринэн хааччыллыбыт. Маны тэҥэ күрэхтэһиилэри кытта ыытар кыах баар.

“Тыа сиригэр биир бастакы уонна соҕотох бассейн Сунтаар нэһилиэгэр баар буолла. Манна күҥҥэ 400 тахса киһи сөтүөлээн, доруобуйавтын чэбдигирдэн ааһар”. Ирена Осипова, корреспондент.

Бассейн уутун күннэтэ бэрэбиэркэлииллэр. Анал лабораторияҕа туһааннаах чинчийиини оҥороллор. Манна аныгы аппарат көмөтүнэн уу температуратын, төһө хлордааҕын көрөллөр.

Айаала Прокопьева, "Байҕал" спорт комплекс лаборана: “Биһиги 3 чаас буола буола хлорун бэрэбиэркэлиибит. Ону тэҥэ уубут PH көрдөрүүтүн көрөбүт. Онтукабыт хайаан да нуормаҕа эппиэттиэхтээх”.

Сөтүөлүүр сир тэбэр сүрэҕэ бу - баараҕай ууну ыраастыыр цистерналар. Барыта аныгы технологиянан үлэлииллэр. Бу мантан бассейн үлэтэ быһаччы тутулуктаах.

Владимир Данилов, "Байҕал" спорт комплекс дириэктэрэ: “Аныгылыы систиэмэ. Барыта автоматика. Үчүгэйдик табан үлэлэттэххэ кээһэниитэ суох үлэлиэхтээхтэр. Уу ультрафиолет нөҥүө ааһар. Онон бассейн уута ып-ыраас”.

Онон Сунтаар улууһун бассейннаах саҥа спорт комплекса бары ирдэбилгэ толору эппиэттиир. Тыа да сиригэр туһааннаах эбийиэктэр олоххо киирэн ситиһиилээхтик үлэлииллэрин туоһута буолар. Күн бүгүн номнуо нэһилиэк 60% тахса  хабан үлэлиир. Инникитин өссө чугастыы сытар нэһилиэктэри хабан бүттүүн улуус олохтоохторун доруобуйаларын чэбдигирдэр сыаллаах үлэ ыытыллар.