Үөһээ Бүлүүгэ тутуута тохтоон турбут тустуу киинин эһиил үлэҕэ киллэрэри Ил дархан сорудахтаата

Тустуу көрүҥнэрин киинэ Үөһээ Бүлүүгэ тутуллан саҕалаабыта номнуо 5 сыл буолла. Тутууну билигин атын бэдэрээччит ылан салгыы сылдьар. Ол эрэн эмиэ үп-харчы кыһалҕатыттан иҥнэн, атырдьах ыйыттан үлэ тохтоон турар. Ил Дархан Айсен Николаев үлэ хаамыытын, тутуу бэлэмин мисэтэтигэр  билсэр. 

Айсен Николаев, СӨ Ил Дархана: "Быйылгыттан үчүгэй үлэ баран, мин көрөрбүнэн, ити эбийиэк эһиил хайаан да үлэҕэ киириэхтээх. Үлэҕэ киирдэҕинэ спорт саалатын кыһалҕата да быһаарыллар  итиэннэ Үөһээ Бүлүүгэ тустуу көрүҥнэригэр улахан өрөспүүбүлүкэ киинэ баар буолуо".

1700 кыб. м. иэннээх баараҕай тутуу  бэлэмэ билигин 65% тэҥэнэһэн турар. Онон улуус бүттүүнэ кэтэһэр тутуута оннуттан дьэ хамсаан олохтоохтор астына сылдьаллар.

Егор Николаев, Үөһээ Бүлүү улууһун спорт салалтатын салайааччы: "Ил дархан мисэтэтигэр кэлэн көрбүтэ саамай сөптөөъ. Эһиилги үп-харчы ттыырллыан иннинэ саамай сөптөөх сыры буолла дии саныыбын. Он кэлэр сылга бүддьүөккэ көрүөххэ, бачча тутуллбут эбийиэги ситэри тутуохха наада диэн эттэ". 

Маны сэргэ Үөһээ Бүлүүгэ оҕо балыыһатын эмтиир корпуһа тутуллар. Былырыын саҕаламмыт эбийиэк былааны куоһаран иһэрин итиэннэ  сыл бүтүүтэ үлэҕэ киирэр кыахтааҕа чопчуланна. Тутааччылар номнуо ис барааны оҥорууга киирбиттэр, бу күннэргэ ититии киирдэ эрэ түмүктүүр түһүмэххэ түһүнүөхтэрэ.  

Александр Петров, "СК Траст"  тутар хампаанньа прораба: "Бу оҕо балыыһата буолар. Икки мэндиэмэннээх 1650 кыб. м. иэннээх. Сытан эрэ эмтэнэр палаталардаах буолар". 

Оттон ыаллыы Ньурба куоратыгар эмиэ тутуу тигинэччи барар. Манна оройуон киин балыыһатын эмтиир корпуһун тутуутун Айсен Николаев көрдө. 3600 кыб. м. иэннээх улахан медициинэ эбийиэгэр хурургия, реанимация, суһал көмө сулууспата  баар буолуохтара. Тутуу былаантан хаалан иһэр. Маны сыбаайа анньыллан турар сиригэр кыһалҕалар үөскээннэр бытаарыы тахсыбытын ыйдылар.

Айсен Николаев, СӨ Ил Дархана: "Бу хаалааһыны ситэргэ былаан оҥорбуттарын көрдүм, бигэргэттим. Ол эрэн былаан диэн былаан. Билигин хайаан да бэдэрээччити кытта күүскэ үлэлээннэр, олох модьуйаннар улууска олус наадалаах эбийиэк үлэҕэ киирэрин ситиһиэхпитин наада". 

Аны икки сылынан Ньурбаҕа Саха сирин норуоттарын 9 спортивнай онньуулара ыытыллыа. Манна анаан стадион тутуллар. 3000 тыһыынча киһи олорон эрэ көрөр миэстэлээх баараҕай кээмэйдээх спорт эбийиэгэр кыһыҥҥы өттүгэр чэпчэки атлетиканан дьарыктанар манежтаах буолуоҕа.

Леонид Спиридонов, СӨ спорт уонна физическэй култуура миниистирэ: "Тутууларбыт этэҥҥэ бара тураллар. Стадион тутулла турар уонна бассейнаах спорт киинэ туттуллар. Ону таһынан Антоновкаҕа, Сүлэҕэ тутуулары былаанныыбыт".

9 спортивнай ооньууларга хайа да сырыытааҕар элбэх спортсмен кыттара күүтүллэр. Онон сүүмэрдиир күрэхтэри үрдүк таһымҥа ыытары Ил Дархан сорудахтаата.